Адыгеим и ЛIышъхьэу КъумпIыл Мурат ТекIоныгъэм и Мафэ ехъулIэу Хэгъэгу зэошхом иветеранхэу Синюгина Валентина Дмитрий ыпхъумрэ Ткаченко Валентин Андрей ыкъомрэ адэжь щыIагъ.
Джащ фэдэу мы Iофтхьабзэм хэлэжьагъэх федеральнэ инспектор шъхьаIэу Сергей Дрокинымрэ Мыекъуапэ имэрэу Геннадий Митрофановымрэ.
Валентина Синюгинар Ярославскэ хэкум 1924-рэ илъэсым щылэ мазэм къыщыхъугъ. Илъэс 18 ыныбжьэу заом кIуагъэ. Тулэ къыщегъэжьагъэу Эльбэ нэс ащ зэпичыгъ. Кенигсбергрэ Берлинрэ яштэн хэлэжьагъ. Анахь тын лъапIэу къыфагъэшъошагъэхэм ащыщых медальхэу «За освобождение Варшавы», «За взятие Кенигсберга», «За взятие Берлина», «За Победу над Германией» зыфиIохэрэр. Заом ыуж офицерэу Синюгин Петр Василий ыкъом ар шъхьэгъусэ фэхъугъ, илъэс 50-м ехъурэ Мыекъуапэ ащ щыдэпсэугъ. Илъэс 14 фэдизрэ къалэу Мыекъуапэ иветеранхэм я Совет П. В. Сенюгиным пэщэныгъэ дызэрихьагъ, Адыгэ Республикэм и Президент дэжь нахьыжъхэм я Советэу щызэхэщагъэм хэтыгъ, 2015-рэ илъэсым дунаим ехыжьыгъ.
ЖъоныгъуакIэм и 9-у къэблагъэрэм фэшI КъумпIыл Мурат гуфэбэныгъэ хэлъэу Валентина Дмитрий ыпхъум фэгушIуагъ, псауныгъэ пытэ иIэнэу, шIоу щыIэр зэкIэ къыдэхъунэу фэлъэIуагъ.
«Заом хэлэжьагъэхэм ятекIоныгъэ тырэгушхо, ахэр зышъхьамысыжьхэу ти Родинэ ишъхьафитыныгъэ фэбэнагъэх. Пыим лIыхъужъныгъэ ахэлъэу пэуцужьхэзэ тинахьыжъхэм зэрахьэгъэ блэнагъэр, ахэм зэпачыгъэр тэркIэ, анахьэу къыткIэхъухьэхэрэмкIэ, ренэу щысэтехыпIэу щытыщт», — къыIуагъ КъумпIыл Мурат ветераным гущыIэгъу зыфэхъум.
Республикэм и ЛIышъхьэ заор зэпызычыгъэ цIыфхэм ренэу ынаIэ зэратыригъэтырэм пае зэрэфэразэр Валентина Синюгинам къыхигъэщыгъ ыкIи Адыгеир нахь зэтегъэпсыхьагъэ хъуным пае Iофышхоу ыгъэцакIэрэм гъэхъагъэхэр щишIынхэу фэлъэIуагъ.
«Я XX-рэ лIэшIэгъум щыIэгъэ зэо тхьамыкIэгъошхом хэлэжьагъэхэр къыткIэхъухьэхэрэм ащымыгъупшэнхэм пае шъуфэлъэкIыщтыр зэкIэ шъушIэ. Заом фэгъэхьыгъэ шIэжьыр ары мамырныгъэр тичIыгу къыщызыухъумэн зылъэкIыщтыр», — къыIуагъ Валентина Синюгинам.
А мэфэ дэдэм республикэм и ЛIышъхьэ Валентин Ткаченкэм дэжь щыIагъ ыкIи ветераным гущыIэгъу фэхъугъ.
Валентин Андрей ыкъом къызэриIотагъэмкIэ, Новороссийскэ къыщыхъугъ, заор къызщежьэщтым ехъулIэу иунагъокIэ Мыекъуапэ къэкIожьыгъагъ. Илъэс 15-м къыщегъэжьагъэу Фрунзем ыцIэкIэ щыт заводым Iоф щишIагъ, мафэ къэс сыхьат 13 токарнэ станокым Iутыгъ, заом пае топыщэхэр ыгъэхьазырыщтыгъэх. 1943-рэ илъэсым заом ащэгъагъ. Я 4-рэ Украинскэ фронтым изэо гъогу щыригъэжьэгъагъ. Тын лъапIэхэу Хэгъэгу зэошхом иорденэу я 2-рэ шъуашэ зиIэр, Жуковым имедал ыкIи «За победу над Германией» зыфиIорэ медалыр къыфагъэшъошагъэх. Заор заухым Ленинград дэт мэз техническэ академиер къыухыгъ, Ростов Iоф щишIагъ, ащ ыужым Мыекъопэ мэзпромхозым итехник шъхьаIэу щытыгъ, мэз техникумым щыригъэджагъэх, Мыекъопэ машинэшI заводым итокарэу щытыгъ. Илъэс 86-м пенсием кIуагъэ.
«Шъо заом ыкIи IофшIэным шъуиIахьышхоу ахэшъушIыхьагъэр къыткIэхъухьэхэрэмкIэ щысэ дэгъу мэхъу. ТекIоныгъэр къызэрэжъугъэблэгъагъэм, ти Хэгъэгушхо нахь зэтегъэпсыхьагъэ хъуным шъузэрафэлэжьагъэм апае инэу тышъуфэраз. МэфэкIым ехъулIэу сыпфэгушIо сшIоигъу, уипсауныгъэ къыкIимычэу илъэсыбэ джыри къэбгъэшIэнэу сыпфэлъаIо», — къыIуагъ КъумпIыл Мурат.
Валентин Ткаченкэм республикэм ипащэ гущыIэ фабэу къыфиIуагъэхэм, ветеранхэм ренэу ынаIэ зэратыригъэтырэм апае зэрэфэразэр къыIуагъ.
«О унаIэ къызэрэтебгъэтырэм тэркIэ мэхьанэшхо иIэу щыт. Ащ щыIэныгъэм нахь тыкIегъэгушIу. Заом хэлэжьагъэхэм ащ фэдэ фыщытыкIэ зэрафыуиIэм пае тхьауегъэпсэу осэIо», — къыIуагъ Валентин Андрей ыкъом.
Адыгеим и ЛIышъхьэ пшъэрылъ зэрафишIыгъэм тетэу Хэгъэгу зэошхом хэлэжьэгъэ ыкIи ахэм афагъадэрэ нэбгыри 137-мэ сомэ мин 50 зырыз аратыгъ. НэмыкI ветеран купхэм ахэхьэрэ нэбгырэ мин 1,6-м ехъумэ сомэ мини 5 зырыз аратыгъ. Ащ нэмыкIэу мэфэкIым ехъулIэу республикэм иветеранхэм хабзэм икъулыкъухэм ыкIи партиеу «Единэ Россием» ацIэкIэ шIухьафтынхэр аратыгъэх.
АР-м и ЛIышъхьэ ипресс-къулыкъу