Хэгъэгу зэошхом ТекIоныгъэр тидзэкIолIхэм къызыщыдахыгъэр илъэс 77-рэ зэрэхъурэм фэгъэхьыгъэ сурэтхэм якъэгъэлъэгъон Мыекъуапэ къыщызэIуахыгъ.
Адыгэ Республикэм исурэтышIхэм я Союз итхьаматэу Елена Абакумовам зэхахьэр зэрищагъ.
— Искусствэм ипроизведениехэу ТекIоны-гъэм и Мафэ къэзыгъэблэгъагъэхэм, Хэгъэгу зэошхом инэкIубгъохэм яхьылIэгъэ сурэтхэр гум къегущыIыкIых, — къыIуагъ Адыгэ Республикэм культурэмкIэ и Министерствэ иотдел ипащэу, Адыгеим культурэмкIэ изаслуженнэ IофышIэу Шэуджэн Бэлэ. — Хэгъэгу зэошхом лIыгъэ щызезыхьэгъэ дзэкIолIхэм ашIыгъэ сурэтхэм къэгъэлъэгъоным имэхьанэ къаIэты.
Республикэм культурэмкIэ и Министерствэ исурэт къэгъэлъэгъуапIэ ипащэу, Адыгеим инароднэ сурэтышIэу Бырсыр Абдулахь зэхахьэм къыщиIуагъ лIэужхэр зэзыпхырэ сурэтхэр бэ зэрэхъухэрэр, къэгъэлъэгъоным икъызэIухын кIэлэеджакIохэр зэрэхэлажьэхэрэм ишIуагъэкIэ тарихъыр нахь дэгъоу зэрагъэшIэным зэрэпылъхэр. ЛIыхъужъхэм егъашIи щысэ атетхыщт.
Адыгеим изаслуженнэ сурэтышIэу Хъуажъ Рэмэзан къэгъэлъэгъоным гъэпсыкIэ дэгъу иIэу ылъытагъ. Гъатхэм идэхагъэ сурэтхэмкIэ къагъэлъагъозэ, мамыр щыIакIэм игъэпытэн искусствэм иIофышIэхэр пылъых.
Мыекъуапэ илицееу N 34-м щеджэрэ Къадыр Дианэ лIыхъужъныгъэм, мамыр щыIакIэм афэгъэхьыгъэ усэм IупкIэу къеджагъ, зэхахьэм хэлажьэхэрэр сэнаущыгъэ зыхэлъ пшъэшъэжъыем Iэгу фытеуагъэх.
Сурэтхэр Композиторэу Тхьабысымэ Умарэ офицер шъуашэр зэкIужьэу щыгъ. Ащ исурэт ЛэупэкIэ Нурбый ышIыгъ. Андрыхъое Хъусен, ТекIоныгъэр къэзыгъэблэгъэгъэ дзэкIолIыр ыкъо зэрэдэгущыIэрэм афэгъэхьыгъэ сурэтхэу Бырсыр Абдулахь къыгъэлъагъохэрэм псынкIэу уябгъукIон плъэкIырэп. Уяплъызэ тарихъым куоу ухащэ, лIыхъужъхэр нэгум кIэтыхэу уагъэгушхо.
Б. Воронкиным «ТекIоныгъэм и Маф» зыфиIорэ сурэтымкIэ Хэгъэгу зэошхом кIэухэу фэхъугъэм урегъэгупшысэ. Д. Мельниковым заом иветеранхэм ясурэт къегъэлъагъо.
Хъуажъ Рэмэзан итворчествэ гъунэ иIэп. Пхъэм хибзыкIи «Шыгъачъэхэр» зыфиIорэ сурэтэу ышIыгъэр гъатхэм, мамыр щыIакIэм, спортым ихэхъоныгъэхэм афэгъэхьыгъ. Гъатхэм ехьылIэгъэ сурэтыри щыIэныгъэм къыхихыгъ. Чъыгыр къэтIэмыгъ, тыгъэм инэбзыйхэм къагъэшIэты…
Сурэти 100 фэдиз къагъэлъагъо. Ф. ПIэтIыуащэм, Т. Къатым, Э. Овчаренкэм, В. Баркиным, М. Тыгъужъым, Л. Синявскаям, Е. Абакумовам, Г. Абрэджым, фэшъхьафхэм яIэпэIэсэныгъэ искусствэ лъагэм дештэ.
Къэгъэлъэгъоныр жъоныгъуакIэм и 12-м нэс Мыекъуапэ щыкIощт.