Адыгэ къэралыгъо университетым, хабзэ зэрэхъугъэу, «пчъэ зэIухыгъэхэм ямафэхэр» бэмышIэу щыкIуагъэх. Я 9-рэ ыкIи я 11-рэ классхэр къэзыухыхэрэр, колледжхэм, техникумхэм ащеджэрэ ныбжьыкIэхэр мыщ къырагъэблэгъагъэх.
ПстэумкIи нэбгырэ 500-м ехъу къекIолIагъ. Апшъэрэ еджапIэм ыкIи ащ епхыгъэ гурыт профессиональнэ еджапIэхэм афэгъэхьыгъэу ахэм къафаIотагъ.
Мы мафэм шIэныгъэхэм ядунай ипчъэхэр университетым къычIахьэ зышIоигъохэм къафызэIуахыгъэх. Концерт-театрализованнэ программэу «Хогвартс будущего» зыфиIорэм къыдыхэлъытагъэу апшъэрэ еджапIэм хьакIэхэр нэIуасэ фашIыгъэх, къыхахын алъэкIыщт сэнэхьатхэр къафаIотагъэх.
Мы лъэхъаным Адыгэ къэралыгъо университетым факультет 12, институти 2 (физическэ культурэмрэ дзюдомрэкIэ ыкIи искусствэхэмкIэ институтхэр), колледж иIэх. Апшъэрэ ыкIи апшъэрэ гъэсэныгъэ ужым программи 100 фэдиз мыщ щыпхыращы (бакалавриатыр, магистратурэр, аспирантурэр); колледжым — сэнэхьат зэфэшъхьаф 20-м ехъу.
2021-рэ илъэсым ыпкIэ хэмылъэу еджэнхэм фэшI зы чIыпIэм нэбгыри 7 итыгъ, ар 2020-рэ илъэсым ебгъапшэмэ, фэдэ 1,5-кIэ нахьыб.
ИкIыгъэ илъэсым УФ-м гъэсэныгъэмрэ шIэныгъэмрэкIэ и Министерствэ изэнэкъокъу программэу «Приоритет-2030» зыфиIорэм Адыгэ къэралыгъо университетыр хэлэжьагъ ыкIи Урысыем иапшъэрэ еджэпIи 106-у сомэ миллиони 100 хъурэ грантыр зэратыгъэхэм ахэфагъ.
Проектэу «Приоритет-2030» зыфиIорэм къыдыхэлъытагъэу университетэу «Сириус» ыкIи компаниеу «Яндекс» зыфиIохэрэм программакIэ гъэшIэгъон дэдэ зэхагъэуцуагъ («Искусственный интеллект в математическом и IT-образовании»). Студентхэу а программэмкIэ еджэщтхэр мыгъэ апэрэу аштэщтых. Мыщ къыхэлажьэ Московскэ физикэ-техническэ институтыр.
2021-рэ илъэсым Iоныгъом и 1-м къыщегъэжьагъэу шэпхъакIэхэм адиштэрэ пилотнэ программи 5-мэ япхырыщын рагъэжьагъэу апэрэ курсым истудент 78-рэ ахэмкIэ еджэх. А зэхъокIыныгъэхэр зылъыIэсыгъэхэр биологиемкIэ, литературнэ творчествэмкIэ, прикладной хьисапымкIэ ыкIи информатикэмкIэ, хьисапымкIэ, социальнэ педагогикэмкIэ программэхэр ары.
АКъУ-м игъэсэныгъэ программэ онлайн-егъэджэн шIыкIэ-амалхэр чанэу щагъэфедэх. ЭкономикэмкIэ Апшъэрэ еджапIэм зэпхыныгъэ дыри-
Iэу платформэу «Онлайн-образование в НИУ ВШЭ» зыфиIорэм студент 74-мэ курс зэфэшъхьафхэр къыщаухыгъэх ыкIи сертификатхэр къаратыжьыгъэх.
2022 — 2023-рэ илъэс еджэгъум Адыгэ къэралыгъо университетым зэраштэщтхэм епхыгъэ шапхъэхэм афэгъэхьыгъэ упчIэу абитуриентхэр ыкIи ахэм янэ-ятэхэр зыгъэгумэкIыхэрэр факультетхэм, институтхэм ялIыкIохэм аратын амал яIагъ.