Апшъэрэ еджапIэхэм ныбжьыкIэ проектхэмкIэ я Урысые зэнэкъокъу Адыгэ къэралыгъо университетым ипроекти 3-мэ текIоныгъэр къащыфагъэшъошагъ.
УФ-м исубъект 80-мэ яеджэпIэ 354-мэ къагъэхьазырыгъэ проект 2422-мэ яавторхэр мы илъэсым зэнэкъокъугъэх. Проектхэм уасэ афашIы зэхъум, командэм иIэпэIэсэныгъэ, щыIэныгъэм щыбгъэфедэнэу щытмэ, социальнэ мэхьанэу иIэр, игъэшIэгъоныгъэ, игъэцэкIэн мылъкоу текIодэщтыр ыкIи шIуагъэу къыхьыщтыр къыдыхалъытагъэх.
Зэнэкъокъум икIэуххэм къызэрагъэлъэгъуагъэмкIэ, АКъУ-м лъэныкъуищкIэ текIоныгъэ къыдихыгъ:
1) Едзыгъоу «Точка притяжения» зыфиIорэм социальнэ проектированиемкIэ еджапIэм ипроектэу «Твой путь» зыфиIорэр анахь дэгъоу алъытагъ. Авторхэр апшъэрэ еджапIэм истудентхэм ыкIи иаспирантхэм я Союз. Грант IэпыIэгъур сомэ 1100000 фэдиз.
2) Едзыгъоу «Открывай страну» зыфиIорэм къащыхэщыгъэр зекIо интернет-порталэу «Культурный QR Майкопа» зыфиIорэм ипроект. Къэзыгъэхьазырыгъэр университетым социальнэ технологиехэмкIэ ыкIи зекIонымкIэ ифакультет. Грант IэпыIэгъур сомэ 700000 мэхъу.
3) Едзыгъоу «Вдохновляй» зыфиIорэм текIоныгъэр къыщыдихыгъ лъэпкъ къашъохэмкIэ апшъэрэ еджапIэм иансамблэу «Нарт» ипроект «Нарту-35» зыфиIорэм. Грант IэпыIэгъур сомэ 500000.
ТекIоныгъэр къыдэзыхыгъэхэм тафэгушIо ыкIи проект гъэшIэгъонхэр тапэкIи пхыращынхэу тафэлъаIо!
Iэшъынэ Сусан.