Мы илъэсым игъэтхапэ и 1-м ыуж IофшIэпIэ чIыпIэр чIэзынагъэхэм IэпыIэгъоу аратырэм федэу къыхьырэр Правительствэм зэригъэшIэнэу УФ-м и Президентэу Владимир Путиным пшъэрылъ фишIыгъ.
ТапэкIи а IэпыIэгъум хагъэхъощт, социальнэ зэзэгъыныгъэхэм зарагъэушъомбгъущт, ахэм къащыдэлъытэгъэ ахъщэ тынхэр къаIэтыщтых.
Бизнесым IэпыIэгъу фэхъунхэм пае агъэнэфэгъэ Iофтхьабзэхэм ащыщэу промышленностым хэхъоныгъэ егъэшIыгъэнымкIэ шъолъырхэм яфондхэмрэ лизинг зытырэ компаниехэмрэ афагъэкIонэу ахъщэ тедзэ афатIупщыщт. Мыри Президентым унашъоу къышIыгъэхэм ащыщ.
Шъолъырхэм зыпкъ итэу хэхъоныгъэ ашIыным фэгъэзэгъэщт штабхэр мэлылъфэгъум и 25-м нэс ащызэхащэнхэ фае.
Къэралыгъом ипащэ иунашъокIэ бюджет ахъщэ чIыфэу (кредитэу) субъектхэм аштагъэхэмрэ ахэм процентэу атехъорэмрэ мы илъэсым амытынхэу ашIыгъ, 2025 — 2029-рэ илъэсхэм анэс япIалъэ афылъагъэкIотагъ.
Джащ фэдэу псэолъакIэу шъолъырхэм ащарагъэжьагъэхэр, ашIыгъагъэу мы уахътэм агъэкIэжьыхэрэр пIалъэхэм адиштэу аухынхэшъ, атIупщынхэм пае псэолъэшIын IофшIэнхэр къызэрэлъэпIагъэхэр къыдалъытэзэ, ахэр афагъэпсынкIэнхэм пае ахъщэ афатIупщыщт.