ЦIыфыр апэрэу космосым зыбыбыгъэр мыгъэ илъэс 61-рэ зэрэхъугъэм фэгъэхьыгъэ Iэнэ хъурае Адыгэ къэралыгъо университетым тарихъымкIэ ифакультет мэлылъфэгъум и 12-м щыкIуагъ.
Апшъэрэ еджапIэм истудентхэм янаучнэ обществэ мыщ кIэщакIо фэхъугъ.
Космонавтикэм илъэныкъо зэфэшъхьафхэр къызэрыкIоу ыкIи гурыIогъошIоу къизыIотыкIырэ доклад гъэшIэгъонхэр Iофтхьабзэм хэлэжьагъэхэм къашIыгъ.
Докладэу «Тема космоса в музыке» зыфиIорэр къыгъэхьазырыгъ музыкэм итеорие ыкIи музыкальнэ пIуныгъэм иметодикэкIэ кафедрэм идоцентэу, педагогикэ шIэныгъэхэмкIэ кандидатэу Ирина Митус. «Юрий Гагарин в фотоискусстве» зыфиIорэр къыIотагъ сурэтшIынымкIэ кафедрэм идоцентэу, педагогикэ шIэныгъэхэмкIэ кандидатэу Еутых Саидэ. ЗэлъашIэрэ космонавтэу Анатолий Березовоир космонавтикэм хэхьанэу зэрэхъугъэр адыгэ филологиемрэ культурэмрэкIэ факультетым иапэрэ курс щеджэрэ Эвелина Пономаревам гъэшIэгъонэу къыриIотыкIыгъ. Дунэе зэфыщытыкIэхэмкIэ факультетым истудентэу Эмир Каримовыр Туркменистан и ЛIыхъужъэу Олег Кононенкэм къытегущыIагъ.
НэмыкI докладыбэхэми къэзэрэугъоигъэхэр ядэIугъэх. Iэнэ хъураем хэлэжьагъэхэм космонавтикэм итемэ агукIэ къызэрапэблагъэр къахэщэу упчIабэ зэратыжьыгъ, космическэ орэдхэм ядэIугъэх, частушкэхэр къаIуагъэх. Анахь къыхагъэщэу зытегущыIагъэхэр американскэ космонавтхэр планетэу «Луна» зыфиIорэм тырагъэтIысхьанхэу зэрэхъугъэр ары, ащ епхыгъэ зэпэуцужьхэр непэ къызнэсыгъэм къекIокIых.
КIэухым студентхэм янаучнэ обществэ итхьаматэу Дмитрий Ню Iофтхьабзэм хэлэжьагъэхэм зэрафэразэр къыIуагъ ыкIи зытегущыIэгъэхэ темэмкIэ ухьазырыныгъэ дэгъу яIэу къызэрагъэлъэгъуагъэр къыхигъэщыгъ.
Iэшъынэ Сусан.