Урысыем исурэтышIхэм я Союз хэтэу Лилия Синявскаям ыныбжь илъэс 75-рэ зэрэхъугъэм фэгъэхьыгъэ къэгъэлъэгъон Мыекъуапэ къыщызэIуахыгъ.
Лилия Синявскаяр къалэу Фрунзе къыщыхъугъ. 2009-рэ илъэсым къыщегъэжьагъэу Адыгэ Республикэм щэпсэу. ИскусствэхэмкIэ республикэ колледжэу У. Тхьабысымэм ыцIэ зыхьырэм, нэмыкIхэм кIэлэегъаджэу Iоф ащишIагъ. АР-м щыкIорэ къэгъэлъэгъонхэм ахэлажьэ, общественнэ пшъэрылъхэр егъэцакIэх.
Хэгъэгу зэошхом ТекIоныгъэр къызыщыдахыгъэр илъэс 75-рэ зэрэхъурэм ехьылIэгъэ шъолъыр зэнэкъокъум ящэнэрэ чIыпIэр къыщыдихыгъ. Сурэтищыр зэхэтэу Хэгъэгу зэошхом инэкIубгъохэр къыгъэлъэгъуагъэх. ТидзэкIолIхэр апсэ емыблэжьхэу кIэлэцIыкIухэр заом имашIо къызэрэхахыжьыгъэхэр Л. Синявскаям щыIэныгъэм къыхихыгъэх.
ЧIыопсым идэхагъэ, инэIосэ цIыфхэм, хъугъэ- шIагъэхэм яхьылIэгъэ сурэтхэр шъо зэфэшъхьафхэмкIэ егъэкIэракIэх. Графикэм, живописым иIэпэIэсэныгъэ къащегъэлъагъо.
Адыгэ Республикэм культурэмкIэ и Министерствэ исурэт къэгъэлъэгъуапIэ щыкIогъэ зэхахьэм къыщыгущыIагъэх Адыгеим инароднэ сурэтышIэу Бырсыр Абдулахь, АР-м исурэтышIхэм я Союз итхьаматэу Елена Абакумовар, Адыгэ Республикэм изаслуженнэ сурэтышIэу Хъуажъ Рэмэзан, фэшъхьафхэри.
Искусствэм щызэлъашIэхэрэ СтIашъу Юрэ, Гъогунэкъо Мухьарбый, Эдуард Овчаренкэр, шапсыгъэ шъолъыр къикIыгъэ Нэгъой Александр, нэмыкIхэри зэхахьэм хэлажьэхэрэм гущыIэгъу афэхъугъэх, Л. Синявскаям фэгушIуагъэх.
ЗэIукIэгъум къекIолIагъэхэм, къыфэгушIуагъэхэм Лилия Синявскаям «тхьашъуегъэпсэу» ариIожьыгъ. Къэгъэлъэгъоныр мэлылъфэгъум и 20-м нэс Мыекъуапэ щыкIощт.
Сахьидэкъо Нурбый.
Сурэтхэр зэхахьэм къыщытетхыгъэх.