УФ-м и Правительствэ илъэсым ышIэгъэ IофшIэным изэфэхьысыжьын окIофэ, медицинэ реабилитацием ипрограммэ зызэрэрагъэушъомбгъугъэр Михаил Мишустиным къыхигъэщыгъ.
Охътэ кIэкIым къыкIоцI ащ фэдэ отделениехэм язэтегъэпсыхьан пэIуагъэхьанэу сомэ миллиарди 8-м ехъу шъолъырхэм афатIупщыщт.
Адыгэ Республикэм псауныгъэр къэухъумэгъэнымкIэ и Министерствэ къызэритыгъэмкIэ, а пшъэрылъыр пхырыщыгъэным епхыгъэ IофшIэныр Адыгеим щырагъэжьагъ.
Федеральнэ проектэу «Медицинская реабилитация» зыфиIорэм къыдыхэлъытагъэу шъолъыр проект агъэхьазыры. 2022 — 2024-рэ илъэсхэм ателъытагъэу игъэцэкIэн сомэ миллион 400-м ехъу пэIуагъэхьащт.
— Стационархэм ыкIи поликлиникэхэм къяолIэрэ сымаджэхэу нервнэ, Iэпкълъэпкъ системэхэм ыкIи нэмыкIхэм япхыгъэ узхэр зиIэхэм яреабилитацие ищыкIэгъэщт медицинэ оборудованиер зэрагъэгъотыным а мылъкур пэIуагъэхьащт, — къыIуагъ псауныгъэр къэухъумэгъэнымкIэ министрэм игуадзэу Максим Коробко.