Ягуапэу яплъых

Донецкэ Народнэ Республикэм итворческэ купхэм ягастроль инхэр гъэтхапэм и 15-м рагъэжьагъэх.

Урысыем ишъолъырхэм концертхэр къащатых, театрэхэм яспектаклэхэр къагъэлъагъох. Хэгъэгу программэу «Мы – Россия» зыфиIорэм хэхьэрэ пчыхьэзэхахьэу Мыекъуапэ щыкIуагъэм заслуженнэ орэдыIо-къэшъокIо къэралыгъо ансамблэу «Донбассыр» хэлэжьагъ. Ансамблэр илъэс 85-рэ зэрэхъурэм концертыр фэгъэхьыгъагъ.

Донецкэ итворческэ купхэм япчыхьэзэхахьэхэр Шъачэ, Ермэлхьаблэ, Ставрополь, Налщык, Щэрджэскъалэ, Волгоград, Саратов, Екатеринбург, Новороссийскэ, Краснодар, Красноярскэ, нэмыкIхэм ащыкIощтых.

Театрэр ашIогъэшIэгъон

Нысхъапэхэм яапэрэ театрэ 1933-рэ илъэсым Донбасс щызэхащагъ. Нысхъапэхэм яакадемическэ театрэ икъэгъэлъэгъонхэр Ростов-на-Дону, ТIуап­сэ, Севастополь, нэмыкIхэм ащыкIуагъэх. Донецкэ икIэлэцIыкIу театрэ икъэгъэлъэгъонхэр Адыгэ Республикэм и Къэралыгъо филармоние мэлылъфэгъум и 5 – 6-м гъэшIэгъонэу щызэхащагъэх.

Пшысэхэм яхьылIэгъэ къэгъэ­лъэгъонхэм кIэлэцIыкIухэр, ны-тыхэр, кIэлэегъаджэхэр ягуапэу яплъыгъэх. Режиссерхэу Михаил Загной ыкIи Анатолий Поляк агъэуцугъэ спектаклэхэр ныб­джэгъуныгъэр бгъэлъэпIэн зэ­рэфаем, уиныбджэгъу цыхьэ къыпфишIыным имэхьанэ, щэIагъэ къызыхэбгъэфэным, нэмыкI­хэм афэгъэхьыгъэх.

Искусствэм цIыфхэр зэрэзэфищэхэрэр театрэхэм, ансамблэхэм якъэгъэлъэгъонхэм къащыхэщы.