«Студентхэм ягъатхэ» рагъэжьагъ

Студентхэм яфестивалэу «Весна АГУ-2022» зыфиIорэр Адыгэ къэралыгъо университетым мэлылъфэгъум и 5-м къыщегъэжьагъэу и 19-м нэс щыкIощт.

Шъугу къэдгъэкIыжьын, мы Iофтхьабзэр Урысые фестивалэу «Российская студенческая весна» зыфиIорэм ишъолъыр едзы­гъоу зэрэщытыр. Урысые фестивалым икIэщакIох – ныбжьыкIэхэм я Урысые Союзрэ платформэу «Россия – страна возможностей» зыфиIорэмрэ.

Илъэс 23-рэ хъугъэу респуб­ликэм щызэхащэрэ Iофтхьабзэм кIэщакIо фэхъугъэр Адыгэ къэралыгъо университетыр ары, муниципальнэ гъэпсыкIэ зиIэ «Къалэу Мыекъуапэ» иадминистрацие гъэсэныгъэмкIэ ыкIи ныбжьыкIэ политикэмкIэ икомитет IэпыIэгъу къыфэхъу.

Творческэ ыкIи сэнаущыгъэ зыхэлъ ныбжьыкIэхэу тикъэралыгъо ишъолъыр пстэуми къарыкIыщтхэм хэхъоныгъэ ашIынымкIэ IэпыIэгъу афэхъугъэныр Iофтхьабзэм ипшъэрылъ шъхьаI. «Студентхэм ягъатхэ» — сэнаущыгъэ ин зыхэлъ цIыфхэу, тиреспублики, нэмыкI шъолъыр­хэми ащызэлъашIэхэрэм, ятворческэ гъогу зыщырагъэжьэгъэ площадкэу щыт. Ахэм ащыщых университетыр къэзыухыгъэхэу, Адыгеим изаслуженнэ артистхэу ЛIыбзыу Аслъан, Нэчэс Анжеликэ, Еутых Вячеслав, Самира Зопунян.

Мы фестивалым ныбжьыкIэ проектыкIэхэр къыщежьэх. Ахэм зэу ащыщ илъэс 12-кIэ узэкIэIэбэжьымэ агъэпсыгъэ Адыгэ къэралыгъо университетым имузыкальнэ театрэу «Арт-Ритон» зыфиIорэр.

Студентхэм яфестивалэу «Весна АГУ» зыфиIорэм текIоныгъэ къыщыдэзыхыгъэхэр фестивалым ифиналхэу Волгоград, Челябинскэ, Налщык, Ульяновскэ, Тольятти, Казань, Тулэ, Ставрополь ащыкIуагъэ­хэм ахэлэжьагъэх ыкIи тын лъапIэхэр къаратыгъэх. Апшъэрэ еджапIэм лъэпкъ къашъохэмкIэ иансамблэу «Нарт» зыфиIорэм пчъагъэрэ мыщ текIоныгъэ къы­зэрэщыдихыгъэм пае щытхъуцIэу «Легенда студвесны» зыфиIорэр къыфагъэшъошагъ ыкIи фестивалыр илъэс 25-рэ зэрэ­хъурэр зыщыхагъэунэфыкIыщт Кремлым исценэ шъхьаIэ зыкъыщигъэлъэгъонэу фитыныгъэ къыратыгъ.

Мы илъэсым «Студентхэм ягъатхэ» Урысыем щыпсэурэ лъэпкъхэм якультурнэ кIэн и Илъэс ыкIи Адыгеим къэралыгъо гъэпсыкIэ зиIэр илъэси 100 зэрэхъурэм къадыхэлъытагъ. Республикэм иапшъэрэ еджапIэхэм, колледжхэм ястудентхэм ясэнаущыгъэ ащ щаушэтын амал яIэщт.

Мыгъэрэ фестивалым хэлэжьэщтхэм зизэкъо орэдыIохэу ыкIи творческэ зэхэт купхэу зыкъыщагъэлъэгъон алъэкIыщт. Ахэм жюрим уасэ афишIыщт. ОрэдкъэIонымкIэ, театральнэ искусствэмкIэ, къэшъонымкIэ, хэушъхьафыкIыгъэ жанрэмкIэ ыкIи модэмкIэ ныбжьыкIэхэр зэнэкъокъущтых.

Шъолъыр едзыгъом текIоныгъэ къыщыдэзыхыгъэхэм дипломхэр ыкIи шIэжь шIухьафтынхэр аратыщтых, ащ дакIоу Урысые фестивалэу «Российская студенческая весна» зыфиIорэм ия 30-рэ финал Адыгеир къыщагъэлъэгъон амал яIэщт. А Iофтхьабзэр жъоны­гъуакIэм и 18 – 24-м къалэу Самара щыкIощт.
Iэшъынэ Сусан.