КIымэфэ Олимпиадэр Шъачэ зыщырагъэкIокIыгъэм къыщегъэжьагъэу зыгъэпсэфыпIэу «Роза Хуторыр» анахь чIыпIэ цIэрыIоу хэгъэгум итхэм ащыщ хъугъэ.
КIымэфэ зыгъэпсэфыгъо лъэхъаныр мэлылъфэгъум и 22-м мыщ щаухыгъ. Ащ лъыпыдзагъэу гъэмафэр, фабэр нахь зикIасэхэм жъоныгъуакIэм и 1-м къыщегъэжьагъэу турхэр бронировать ашIыхэу рагъэжьагъ.
ЗекIон кэшбэкыр зыгъэфедэхэрэм зыгъэпсэфыпIэу «Роза Хуторыр» зэрахэтыр Ростуризмэм къыIуагъ. Турхэр жъоныгъуакIэм и 1-м нэс зыщэфыхэрэм атыгъэ ахъщэм ипроцент 20 къафызэкIагъэкIожьыщт.
ЗыгъэпсэфыпIэм маркетингымкIэ идиректорэу Дмитрий Барашковым къыIуагъ мы мафэхэм гъэмафэм зызэрагъэпсэфыщтым егупшысэхэрэм яфедэ хэлъэу путевкэхэр ащэфынхэ зэралъэкIыщтыр.
— ТихьакIэхэм яшIоигъоныгъэхэр къыдэтлъытэхэзэ мэфэ пчъагъэу зызэрагъэпсэфыщтыр, нэмыкI фэIо-фашIэу зыфаехэр къыхядгъэхыщтых, — къыIуагъ ащ.
Кэшбэкым фэшъхьафэу турпакетэу «Крутые Горы Лето Макс» зыфиIорэр зыщэфыхэрэми уасэхэм къафыщагъэкIэщт. ХьакIэщхэм мэфищым къыщегъэжьагъэу мэфиблым нэс уащыпсэун уфит.
Зэрагъашхэхэрэм фэшъхьафэу, алъэгъунэу зыфэехэ чIыпIэ дахэхэм зэранэсыщтхэм, зыгъэпсэфыпIэм имузей зэрэчIэхьащтхэм атефэрэ уасэхэр арагъэтыщтхэп.
Зыгъэхьазырыгъэр
Шъаукъо Аслъангуащ.