МашIом зыкъымыштэнымкIэ Урысые Федерацием щагъэуцугъэ шапхъэхэм зэхъокIыныгъэу афашIыгъэхэм мы илъэсым щылэ мазэм кIуачIэ яIэ хъугъэ.
ЦIыф псэупIэхэм, садлэжьыпIэхэм къапэблагъэу чIыгу Iахьхэр зиIэ цIыфхэм хэкIымрэ уцыжъ гъугъэхэмрэ ягъэстынкIэ сакъыныгъэ къызхагъэфэн фае.
МашIом зыкъымыштэнымкIэ шапхъэу щыIэхэр зыукъохэрэм административнэ тазыр атыралъхьэ: цIыфхэм — сомэ мини 2-м къыщыублагъэу мини 3-м нэс; IэнатIэ зыIыгъхэм — сомэ мини 6-м къыщегъэжьагъэу мин 15-м нэс; предприниматель IофшIэныр зыгъэцакIэхэрэм — сомэ мин 20-м къыщыублагъэу мин 30-м нэс; юридическэ лицэхэм — мини 150-м къыщегъэжьагъэу мин 200-м нэс.
Шъугу къэтэгъэкIыжьы:
— унаеу зычIэсыщт унэхэр, чъыгхатэхэр (дачэхэр), хатэхэр зиIэхэм псы зэрыт пхъэчайхэр, машIор зэрэбгъэкIосэщт пкъыгъохэр яIэнхэ фае;
— псэуалъэхэм, унэхэм, транспортыр зыщагъэуцурэ чIыпIэхэм къапэблагъэу пыдзафэхэр ащыбгъэсты хъущтэп, ащкIэ къыдэлъытэгъэн фае ахэм азыфагу илъыр зыфэдизыр;
— гъогухэр, чIэхьапIэхэр, дэхьапIэхэр, унэхэм якIурэ гъогухэр ренэу уякIолIэн плъэкIынэу щытынхэ фае;
— чIыпIэхэр гъэстыныпхъэхэм, хэкIым, уцыжъхэм, чъыгхэм къапытэкъугъэ тхьапэхэм ыкIи нэмыкIхэм ащышъуухъумэх, нэмыкIэу къэпIон хъумэ, ахэр къэшъуугъоинхэшъ, контейнерхэм е ящикхэм арышъулъхьанхэшъ, Iушъущынхэ фае.
Муниципальнэ образованием ичIыпIэ горэм машIом зыкъыщиштэным ищынагъо щыIэу загъэунэфыкIэ, пхъэ машIохэр амышIынхэу, уцыжъхэр ыкIи хэкIыхэр амыгъэстынхэу афагъэпытэ.
МашIом зыкъыштэмэ, телефонхэу 01-мкIэ, 101-мкIэ е 112-мкIэ шъукъытеу.
И. Е. Бэгъушъ.
Къалэу МыекъуапэкIэ ыкIи Мыекъопэ районымкIэ къэралыгъо инспектор.