Къэралыгъо IэпыIэгъу ратыщт

Охътэ къинэу тызыхэтым емылъытыгъэу, экономикэм хэхъоныгъэ егъэ­шIыгъэнымкIэ Адыгеим амалышIухэр IэкIэлъых. Мы лъэныкъомкIэ Iофы­гъоу зэрахьэхэрэр бизнесыр къэухъумэгъэным ыкIи ащ хэхъоны­гъэ ышIыным фэIорышIэх.

ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Сады Адыгеи» зыфиIорэм (гъэцэкIэкIо директорыр Людмила Цулаевар) илъэIу тхылъ зыхаплъэхэ нэуж унашъо ашIыгъ фэгъэкIотэныгъэ иIэу предприятием къыригъэкIокIын ылъэкIыщт чIыфэ ратынэу. Программэу «Женщина-предпри­ниматель» зыфиIорэм хахьэу мэзэ 36-м телъытэгъэ сомэ миллиони 5 фэдиз (проценти 4,5-рэ тегъэхъуагъ) IэкIагъэхьа­нэу агъэгугъагъ.

Теуцожь районым ичIыгу Iахь бэджэндэу къаIихыгъэу предприятиер пхъэшъхьэ-мышъхьэ къызыпыкIэрэ чъыгхэм, шъхьандэхэм ыкIи дэхэм якъэгъэкIын ыуж ит.

Лъэпкъ проектэу «Предпринимательствэ цIыкIур ыкIи гурытыр, унэе предпринимательствэм IэпыIэгъу фэхъугъэныр» зыфиIорэм хахьэу чIыфэр ратыщт.

— ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Сады Адыгеи» зы­фиIорэм чIыфэу къаIихыщтымкIэ къагъэкIыхэрэр къыухъу­мэщтых, яшIушIэщт ыкIи ахэм апэIухьащт материалхэр зэригъэуIущтых, — къыIуагъ Людмила Цулаевам.

АР-м экономикэ хэхъоны­гъэмкIэ и Министерствэ къызэрэщаIуагъэмкIэ, мыщ фэдэ екIолIакIэм ишIуагъэкIэ мэ­къу-мэщ хъызмэтым епхыгъэ Iоф­шIэпIэ чIыпIэхэр къаухъумэщтых, джащ фэдэу бюджетым хэбзэIахьэу рагъахьэрэр нахьыбэ хъущт.