Лъэпкъ искусствэр, кIэлэеджакIохэр

Зэнэкъокъур еджапIэ афэхъу

Адыгэ Республикэм ия VII-рэ зэIухыгъэ фестиваль-зэнэкъокъоу Лъэцэрыкъо Кимэ фэгъэхьыгъэр Мыекъуапэ зэрэщыкIуагъэр зэфэтэхьысыжьы.

Лъэпкъ IэпэIасэу, пщынэо цIэрыIоу, композиторэу Лъэцэрыкъо Кимэ къыгъэнэгъэ лъэужыр искусствэм хэкIокIэщтэп. Ипщы­нэ ыгъэбзэрабзэ зыхъукIэ ор­кест­рэм фэдэу изакъоу произведениехэр ыгъэIущтыгъэх. Ащ ышIыгъэ шыкIэпщынэхэм ащыщ­хэр Адыгэ Республикэм исурэт къэгъэлъэгъуапIэ лъэгъупхъэу чIэлъых.

Лъэпкъ пщынэмкIэ адыгэ ордышъохэр къегъэIогъэнхэм фэгъэхьыгъэ зэнэкъокъур Адыгэ Республикэм искусствэхэмкIэ икIэлэцIыкIу еджапIэу Лъэцэрыкъо Кимэ ыцIэ зыхьырэм джырэблагъэ щызэхащагъ. Респуб­ликэм культурэмкIэ и Министерствэ, АР-м искусствэхэмкIэ икIэ­лэцIыкIу еджапIэу N 1-м методикэмкIэ игупчэ зэнэкъо­къум кIэщакIо фэхъугъэх. Лъэпкъ пщынэмкIэ адыгэ орэдышъохэр къегъэIогъэнхэмкIэ кIэлэеджа­кIохэм яIэпэIэсэныгъэ къагъэлъэгъуагъ.

Аныбжьхэм ялъытыгъэу зэ­нэкъокъум хэлажьэхэрэр купищэу гощыгъагъэх. Апэрэ купым пщынаоу Хьаджэбыекъо Пэрыт текIоныгъэр къыщыдихыгъ. ДШИ N 1-м щеджэ, кIэлэегъаджэр С. Мэрэтыкъу. М. Хьагъэуджым ыцIэ зыхьырэ Кощхьэблэ еджапIэм зыщызыгъэсэрэ Чэмбэхъу Нарт ятIонэрэ чIыпIэр фагъэшъо­шагъ, кIэлэегъаджэр И. Агъыржьанэкъу. ИскусствэхэмкIэ Тэхъутэмыкъуае икIэлэцIыкIу еджапIэ къикIыгъэ Тыгъужъ Иляс ящэнэрэ чIыпIэр ыхьыгъ, зыгъа­сэрэр Н. Тыгъужъ.

ЯтIонэрэ купым щызэнэкъо­къугъэ кIэлэеджакIохэм ЛIыIужъу Айтэч къахэщыгъ. ДШИ N 1-м щеджэ, кIэлэегъаджэр С. Мэрэтыкъу.

Адыгэкъалэ искусствэхэмкIэ икIэлэцIыкIу еджапIэ зыщызыгъа­сэхэрэм ятIонэрэ ыкIи ящэнэрэ купхэм ящэнэрэ чIыпIэхэр къащахьыгъэх. Ахэр ХъокIо Альберт­рэ ЛIэхъусэжъ Дамиррэ, кIэлэегъаджэр Хьэкомэ Сим.

Кушъу Ренат ятIонэрэ чIыпIэр фагъэшъошагъ. Афыпсыпэ ще­джэ, М. Лъэпшъыкъом егъасэ.

Ансамблэхэм язэнэкъокъу

Адыгэ лъэпкъ музыкальнэ Iэмэ-псымэхэр зыхэт ансамблэу Адыгэкъалэ къикIыгъэм апэрэ чIыпIэр къыдихыгъ, пащэр С. Хьэ­куамэ. Афыпсыпэ икIэлэцIыкIу еджапIэ иансамблэ ятIонэрэ чIыпIэр фагъэшъошагъ, пащэр М. Лъэпшъыкъу. Тэхъутэмыкъуае искусствэхэмкIэ икIэлэцIыкIу еджапIэ иансамблэ ящэнэрэ хъугъэ, кIэлэегъаджэр Н. Тыгъужъ.

КIэлэегъаджэхэу Лъэпшъыкъо Мариет, Хьэкомэ Симэ, Тыгъужъ Нурбый Лъэцэрыкъо Кимэ фэгъэхьыгъэ зэнэкъокъум мэхьэнэ ин иIэу алъытэ. Лъэпкъ искусствэм кIэлэеджакIохэр нахьышIоу фэщэгъэнхэмкIэ ащ фэдэ зэIукIэгъухэр ящыкIагъэх. Пщынаохэр упчIэжьэгъу зэфэхъух, лъэпкъ искусствэм ехьылIэгъэ къэбар­хэр къызэфаIуатэх.

— Ансамблэм хэт кIэлэеджа­кIохэр зэнэкъокъум фэдгъэхьазырхэзэ, зым зыр едэIун, зэхихын зэрэфаем тылъыплъагъ, — къытиIуагъ Адыгэ Республи­кэм культурэмкIэ изаслуженнэ IофышIэу Хьэкомэ Симэ. — Пщынаом ежь-ежьырэу зызэхи­хыжьыным имэхьани къыхэзгъэ­щы сшIоигъу.

Щытхъу тхылъхэр

ЗэхэщакIохэм ящытхъу тхылъхэр аратыжьыгъэх пщынаохэу Къадэ Астемир, ЩашIэ Динарэ, Хъунэго Мыхьамэт, КIыкI Дамир, ЯхъулIэ Расул, Кушъу Ренат, Хьагъур Алибек. Ахэр езыгъа­джэхэрэм афэгушIуагъэх.

Зэнэкъокъум илауреатхэр зыгъэхьазырыгъэхэ С. Мэрэтыкъом, С. Хьэкуамэм, М. Лъэп­шъы­къом, А. Полун, И. Агъыр­жьанэкъом, Б. ГъукIэлIым, Н. Тыгъужъым щытхъу тхылъхэр аратыжьыгъэх.

ОсэшI купым Андрей Полун ипэщагъ. ГъукIэлI Батыр ыкIи Шэуджэн Рустам ащ игуадзэхэу щытыгъэх.

Зэнэкъокъум изэхэщэкIо куп хэтэу Лариса Грачевам къызэрэтиIуагъэу, къэралыгъо гъэ­псыкIэ иIэу Адыгеир зыпсэурэр илъэси 100 зэрэхъурэм фэгъэ­хьыгъэ зэхахьэхэм пщынаохэр ахэлэжьэщтых, зэнэкъокъу зэ­фэшъхьафхэм зафагъэхьазы­рыщт.
Сахьидэкъо Нурбый.