Игъо шъыпкъэу алъытагъ

Аужырэ лъэхъаным сабыйхэр зиIэ унагъохэм хабзэм ахъщэ IэпыIэгъукIэ ишIуагъэ къарегъэкIы. Джыри илъэси 8-м къыщегъэжьагъэу илъэс 16-м нэс зыныбжь кIэлэцIыкIухэм апае IэпыIэгъоу сомэ миллиард 455-рэ къэралыгъо бюджетым къыхагъэкIыгъ.

ТапэкIэ хабзэр зыдэIэпыIэщтыгъэр илъэси 3 – 7 зыныбжь кIэлэцIыкIухэу ятэ е янэ иза­къоу ыпIущтыгъэхэр ары. Джы яни яти зиIэхэри чэзыум ха­гъэуцощтых.

Урысые Федерацием IофшIэнымрэ социальнэ ухъумэным­рэкIэ и Министерствэ ипащэу Антон Котяковым илъэси 8-м къыщегъэжьагъэу 16-м нэс зыныбжьхэм ахъщэ IэпыIэгъоу къаратыщтыр зыфэдизыщтыр къыIотагъ.

IэпыIэгъур щэу зэтефыгъэщт. Унагъом мазэ къэс къихьэрэ мылъкум ар елъытыгъэщт. Ха­хъоу яIэр нэбгырэ пчъагъэу зэрэхъухэрэм зытеплъытэжьыкIэ, урыпсэунымкIэ анахь ахъщэ макIэу (МРОТ) шъолъырым щагъэнэфагъэм фэмыдизмэ ары IэпыIэгъур къызыуатыщтыр, ар сомэ мини 6 зэрэхъурэр. Ар хэлъытагъэми унагъом къихьэрэ ахъщэр МРОТ-м нэмысымэ, а IэпыIэгъум ипроцент 75-рэ къа­ратыщтыр. ЕтIани унагъом щыщхэм къатефэрэ Iахьэр МРОТ-м кIэмыхьэмэ, ахъщэ IэпыIэгъур зэрэпроценти 100-у къаратыщт.

КIэлэцIыкIухэм IэпыIэгъу къафэхъунхэм пае лъэIу тхылъ закъор ары агъэхьазырынэу щытыр. Ахэр зытхыхэрэ унагъо­хэм ялэжьапкIэ, япенсиехэр, стипендиехэр, кIэлэпIупкIэр, нэмыкIэу къахахъорэр къалъы­тэщт. Джащ фэдэу унэу, фэтэрэу, автомобилэу, гаражэу яIэр зыфэдизыр зэрагъэшIэщт.

IэпыIэгъукIэу агъэнэфагъэм хафэ зышIоигъохэм лъэIу тхылъхэр жъоныгъуакIэм и 1-м къыщыублагъэу атхынхэ фитых, порталэу «Госуслуги» зыфиIорэр IэпыIэгъу къафэхъущт.
ЛъэIу тхылъхэм зы илъэс текIыфэ кIуачIэ яIэщт, нэужым пIалъэр ыпэкIэ лъагъэкIуатэзэ ашIыщт. Ахъщэ IэпыIэгъур мэлылъфэгъу мазэм къыщегъэжьагъэу ары къызафалъытэщтыр, апэрэ мэзитIум атефэрэр зэгъусэу къаратыжьыщт.

Шъаукъо Аслъангуащ.