Хьыкум приставхэм къаты

IэпыIэгъу афэхъугъэх

Хьыкум приставхэм я Федеральнэ къу­лыкъу АдыгеимкIэ и ГъэIорышIапIэ икъулыкъушIэхэр шIушIэ Iофтхьабзэм хэлэжьа­гъэх.

Донецкэ ыкIи Луганскэ народнэ республикэхэр егъэзыгъэ IофкIэ къэзыбгынагъэхэм мы мафэхэм шIушIэ IэпыIэгъу афаугъоигъ.

Хьыкум приставхэм гъомылапхъэхэр, пкъыгъо зэфэшъхьафхэр, анахьэу кIэлэцIыкIухэм апае, къа­угъоигъэх ыкIи ахэр чIыпIэ къин ифэгъэ цIыфхэм афащагъэх.
Шъузфэсакъыжь

ГъэпцIакIохэм хьыкум приставхэу зыкъагъэлъагъозэ бзэджэшIагъэхэр зэрахьэх.

ЦIыфым чIыфэ телъэу иэлектроннэ почтэ тхыгъэ къыфагъэхьы ыкIи ар псынкIэу къыпщынын зэрэфаер гурагъаIо. Ар зимыгъэцакIэкIэ ибанковскэ счет ыкIи имылъку арест къатыралъхьанэу къэбар нэпцI къыфатхы.

ГъэпцIакIохэм цIыфхэр зэрагъэделэщтхэм фэшI шIыкIэ зэфэшъхьафхэр агъэфедэх, арышъ, мыщ дэжьым сакъыныгъэ къызхэжъугъэфэнэу хьыкум приставхэр къышъоджэх.

Хьыкум приставхэм официальнэ сайтхэр яIэх, ахэм шъуарыхьэмэ, шъуищыкIэгъэ къэбарыр арыжъугъо­тэщт. Ау сайт шъыпкъэри нэпцIыри мэкIэ дэдэу зэтекIынхэ алъэкIыщт, арышъ, ащи шъунаIэ тешъудз. Федеральнэ къулыкъум исайтэу «Банк данных исполнительных производств» зыфиIорэм шъуихьэмэ, чIыфэу шъуте­лъыр зыфэдизыр ыкIи ар зэрэшъупщынын шъулъэкIыщтыр зэжъугъэшIэщт. Джащ фэдэу къэралыгъо фэIо-фашIэхэм япортал ыкIи мобильнэ приложениеу «ФССП-м» амалэу къатыхэрэр къызфэжъугъэфедэнхэ шъулъэкIыщт.

ЧIыфэр къыпщыныгъ

Административнэ пшъэдэкIыжь зэрэра­гъэхьыгъэм ыкIи охътэ гъэнэфагъэм иавтомобиль зэрифэн фимытэу хэбзэухъумакIохэм унашъо зэрашIыгъэм къыхэкIыкIэ Мыекъуапэ щыпсэурэ хъулъфыгъэм кIэлэпIупкIэм итынкIэ чIыфэу зэIуигъэкIагъэр къыпщыныжьыгъ.

Хьыкумым унашъоу ышIыгъэм диштэу хъулъфы­гъэм къыIэкIэхьэрэ хахъом ызыплIанэ исабый фызэкIи­гъэкIожьынэу щытыгъ. Ау ипшъэрылъхэр зэримыгъэ­цакIэхэрэм къыхэкIэу чIыфэр сомэ мин 200-м ехъугъ.

ЗэгъэшIужь хьыкумышIыр мы Iофым хэплъагъ ыкIи хъулъфыгъэм лажьэ иIэу ыгъэунэфыгъ. Сыхьат 50-м телъытэгъэ шIокI зимыIэ IофшIэнхэр ыгъэцэкIэнхэу унашъо ышIыгъ. Ащ ыуж ары ныIэп тым чIыфэу те­лъыр къызипщыныжьыгъэр.

Хьыкум приставхэм я Федеральнэ къулыкъу АдыгеимкIэ и ГъэIорышIапIэ ипресс-къулыкъу.