«Донбассрэ» «Налмэсымрэ» япчыхьэзэхахь

Хэгъэгу программэу «Мы — Россия» зыфиIорэм хэхьэрэ пчыхьэзэ­хахьэр игъэкIотыгъэу Мыекъуапэ щыкIуагъ.

Заслуженнэ орэдыIо-къэшъокIо къэралыгъо ансамблэу «Донбассыр» илъэс 85-рэ зэрэхъурэм фэгъэхьыгъэ концертым Адыгэ Республикэм и Къэралыгъо академическэ ансамблэу «Налмэсыр» хэлэжьагъ.

Зэгъусэхэу ансамблэ цIэрыIуи­тIум концертыр къызэратырэм Адыгеим и ЛIышъхьэу КъумпIыл Мурат мэхьэнэ ин иIэу ылъы­тагъ.

Урысыем икъэлэ 54-мэ юбилей концертхэр «Донбассым» къащитыщтых. Мыекъуапэ щызэхащэгъэ Iофтхьабзэм «Донбассыр» ыкIи «Налмэсыр» щыуджыгъэх, лъэпкъ къашъохэр къыщагъэлъэгъуагъэх.

«Донбассым» ирепертуар хэтыгъэх «Березка», «Бубенцы», «Лодочка», «Калинка» зыфиIо­хэрэр, нэмыкIхэри. Орэдымрэ къашъомрэ зэдиштэхэу ансамблэм иконцерт ыгъэпсыгъ.

IэкIыб къэралхэм ащыпсэурэ тилъэпкъэгъухэм якъашъохэр, «Анатолие ищэрджэс къашъу» , «ШIуфэс къашъу» зыфиIохэрэр «Налмэсым» къышIыгъэх. Пчыхьэзэхахьэм еплъыгъэхэр ансамблэхэм бэрэ Iэгу афытеуагъэх.

Донецкэ народнэ республикэм и Къэралыгъо академическэ ансамблэу «Донбассым» лъэпкъ искусствэр къыухъумэзэ, хэхъоныгъэхэр фешIых. «Гастроль инхэр» зыфиIорэ программэм хэлажьэзэ, 2022-рэ илъэсым гъэтхапэм и 15-м къыщегъэжьагъэу концертхэр къетых. Краснодар, Ставрополь крайхэм, Рос­тов-на-Дону, Астрахань, Элиста, Волгоград, Саратов, Екатеринбург, Новосибирскэ, Кемерово, Красноярскэ, нэмыкIхэм концертхэр ащыкIощтых.

«Донбассым» июбилей фэгъэ­хьыгъэ иапэрэ концертхэм ащыщ Мыекъуапэ зэрэщыкIуагъэм тигъэгушIуагъ, искусствэр зышIогъэ­шIэгъонхэр ягуапэу еплъыгъэх.

Адыгэ Республикэм и ЛIышъхьэу КъумпIыл Мурат ишIуфэс тхылъэу «Донбассым» факIорэм къыщеIо Донбассрэ Адыгеимрэ язэфыщытыкIэхэр щыIэныгъэм зэрэщагъэпытэщтхэр, искусствэм иамалхэр агъэфедэхэзэ тапэкIи зэрэзэIукIэщтхэр.

Адыгэ Республикэм культурэмкIэ иминистрэу Аулъэ Юрэ «Донбассым» ихудожественнэ пащэу Ольга Горячевам ти ЛIышъхьэ ыцIэкIэ фэгушIуагъ, шIуфэс тхы­лъыр зэхахьэм щыритыжьыгъ.