Симферополь щыбэнэщтых

Къыблэ шъолъырым самбэмкIэ изэнэкъокъу гъэтхапэм и 18 — 21-м Новороссийскэ щыкIуагъ.

— Илъэс 14 – 16 зыныбжь кIалэхэр, пшъашъэхэр алырэгъум щыбэнагъэх. НыбжьыкIэ 400-м нахьыбэ зэнэкъокъум хэлэжьагъ, — къытиIуагъ Адыгэ Республикэм самбэмкIэ испорт еджапIэ ипащэу, Урысыем спортымкIэ дунэе класс зиIэ имастерэу Делэкъо Адам. — ТибэнакIохэм хагъэунэфыкIырэ чIыпIэхэр къыдахыгъэх.

Астрахань, Волгоград, Ростов хэкухэм, Севастополь, Къалмыкъым, Къырым, Краснодар краим, Адыгеим яныбжьыкIэхэм яIэпэ­Iэсэныгъэ зэнэкъокъум къыща­гъэлъэгъуагъ.

Адыгэ Республикэм щапIугъэ Мэлыщэ Аскэр, кг 88-м къехъу, апэрэ чIыпIэр къыдихыгъ, тренерыр З. Ацумыжъ. Хьатхъохъу Рустам, кг 64-рэ, ятIонэрэ чIыпIэр къыфагъэшъошагъ, ипащэр тренерэу Б. Шъэумэн.

Ящэнэрэ чIыпIэхэр бэнэкIуи 5-мэ къахьыгъ. Кушъу Тамерлан, кг 49-рэ, Цуужъ Амир, кг 58-рэ, Апыщэ Ислъам, кг 58-рэ, Анцокъо Амир, кг 64-рэ, Былымыхьэ Амир, кг 88-рэ – джэрз медальхэр къа­хьыгъэх. Тренерхэу Б. Шъэумэныр, А. Мырзэр, А. Хьабэхъур, А. Делэкъор, М. Хьабыир нарт шъаохэм япащэх.

Медальхэр къыдэзыхыгъэхэр Урысыем икIэух зэнэкъокъоу Iоныгъо мазэм и 25-м Симферополь щыкIощтым хэлэжьэщтых. Дышъэр хэгъэгум изэIукIэгъухэм къащызыхьыхэрэр дунаим иныбжьыкIэхэм язэIукIэгъухэм ащыбэнэщтых.

Сурэтым итых хагъэунэфыкIырэ чIыпIэхэр зы купым къыщыдэзыхыгъэхэр.