НыбжьыкIэ макъэхэр

Чанэу ахэлажьэх

Ныдэлъфыбзэмрэ тхыбзэмрэ я Мафэ фэгъэхьыгъэ Iофтхьабзэхэр илъэс къэс Адыгэ кIэлэегъэджэ колледжым щызэхащэх. Ахэм студентхэр, кIэлэегъаджэхэр чанэу ахэлажьэх. Адыгабзэм фэгъэхьыгъэ усэу студентхэм, колледжым щеджагъэхэм атхыгъэхэм ащыщхэм нэIуасэ шъуафэтэшIы.

Синыдэлъфыбз

Пщыгъупшэжьыгъэмэ уиныдэлъфыбзэ,
Пщыгъупшэжьыгъэмэ уиадыгабзэ,
КъысаIу, ныбджэгъур, о уадыга?
Лъэпкъым ущыщэу укъэнэжьыгъа?
Е кIосэжьыгъа джэныкъо машIоу
Уисабыигъом ощ пае благъэр?
Уашъом зищэеу, гугъэпIэ IэшIоу
ГущыIэ бзыеу ом ибыбагъэр?
КъысаIу, ныбджэгъур, о уадыга,
Уиадыгабзэ пIупэ Iумылъэу?
Укъэзылъфыгъэм уфэхъумэ хымэ,
НэмыкI цIыф лъэпкъми уряхымэн.
Уиадыгабзэ къычIэунагъэмэ,
О уадыгэп, узышIошIагъоми!

ЛIыхъужъ цIэрыIу

ЗэкIэми зэлъашIэу
ТилIыхъужъ цIэрыIу,
Зэошхоу блэкIыгъэм
ЛIыгъэшхо щызепхьагъ.
Ппсэ уемыблэжьэу
Уихэку къэбгъэгъунагъ,
Узышъхьамысыжьэу
Пыим упэшIуекIуагъ.
Илъэсхэр зэблэкIми,
ТигъашIэ ухэмыкI,
Уащымыгъупшэнэу
Хэти ыгу уилъ.
Ощ фэдэ лIыхъужъхэм апае
Тисабыйxэм усэхэр атхыщт,
Тидунай имамырныгъэ пае
Узфэбэнэгъэ щыIакIэр тэ дгъэлъэ­пIэщт!!!

Бэрзэдж Анжел.

Адыгэ пшъашъ

Адыгэ пшъашъэм сыд ихъупхъагъа?!
Адыгэ пшъашъэм сыд идэхагъа?!
Ыпчэнэ псыгъуи, ышъхьац кIыхьи,
Сыдэу зэкIужьа исэе плъыжьи!
Адыгэ пшъашъэм сыд ихъупхъагъа?!
Ащ ихъупхъагъэ чIыр зэлъекIухь,
ЫIэпэ фыжьхэм дышъэр апэз,
Ащ фэдэу тетыр дунаим зырыз.
Адыгэ пшъашъэм сыд ихъупхъагъа?!
Адыгэ пшъашъэр сым исурэт
Ышъхьац кIыхьэ тыгъэм пэлыд.
Ынэ хъураехэм гур къыпфаIэт,
Ыпчэнэ псыгъо зэкIужьэу ищыгъ,
Ищыгъын дахэу саер фэхъугъ,
«Ислъамые» къашъом ар хэтэу
ЧIышъхьашъом щэбыб!

Хъут Марин.

 

«Хэт ыбзэ нахьышIоу угугъэра?»

«Хэт ыбзэ нахьышIоу угугъэра?»
Зыгорэм упчIэ къыситыгъ.
Ныдэлъфыбзэм нахь бзэ IэшIу щымыIэу
Ащ джэуап естыжьыгъ.
Адыгэ лъэпкъым сэ сырипшъашъ,
Адыгэм ыбзэр — синыдэлъфыбз.
Тыгъэжь нурэу сашъхьагъ итэу
Синыдэлъфыбзэ гъогу сфыхихыгъ,
СигъашIэ лъагэу ар щысIэтыгъ!

Ахъмэт Бэлл.

Сиадыгабзэу синыдэлъфыбз

Лъагэу сеIэты,
Бэ сегъэлъэгъу,
Зынахь дахэ щымыIэу
Сиадыгабзэ!
Тамэ сгуегъакIэ,
Сегъэбыбатэ,
ШIэныгъэ къысеты
Сиадыгабзэ.
Сэгъэбзэрабзэ
Синыдэлъфыбзэу сиадыгабзэ.
УимэфэкI мафэ
Сыгу къыздеIэу
СэгъэмэфэкIы, сиадыгабз!

Былымыхьэ Саид.

Адыгэ лъэпкъыр

Адыгэ лъэпкъыр, зыпфэсэгъазэ,
Тиадыгабзэ чIэны умышI!
УмыгъэкIод адыгэ хабзэр,
Уянэ ыбзэ зыщымыгъэгъупш!
Лъэпкъым ылъапсэр гущыIэ къабзэу,
О рыгущыI тиадыгабзэ,
Хэгъэгу кIасэм ыпсэ занэу
Лъэпкъым ыбзэу тиадыгабзэ!
КIуай Фатим.

Сыадыг

Сэ сыадыг,
Адыгеим сис,
Адыгабзэр сыбзэ
Сыгу изыбзэу,
Сынасыпышly.
Насып къысэзытрэр синыдэлъфыбз,
Адыгэ цIыфым — аp иIункIыбз.
Пщынэм фэдэу зигъэбзэрабзэу
Анахь бзэ дахэмкIэ
Сыгу нахьышIум фэусэ…
Адыгэ чIыгум фэсэIo yсэ!
Сыадыг,
Адыгеим сис.
Сихэку — Iапэ щиз,
Ау икъэбар чIым тиз.
Ипсыхъо къаргъо,
Икъушъхьэ лъагэ,
ИцIыф шIагъомэ ящытхъу
Чыжьэу щаIуатэ.
Сэ сыадыг,
Сихэку сэ сис,
Адыгабзэр сыбзэ
Сыгу изыбзэу нахьышIум фэусэ.
Тиогуи мамырэу,
Тигъoгyи тыфитэу,
Нэфынэу тигугъэ
Tшъхьащэрэт титыгъэ!

ЛIыхъужъ

Ошъопщэ шIуцIэм тичIылъэ зэлъишти,
Зэо гуихыр тэ къытфэкIyагъ.
ЩыIакIэу тиIэр пый хъопсапIэу
ЗэкIакIо ямыIэу укъауцухьагъ.
Илъэс 80-кIэ тызэкIэплъэжьмэ,
Бжыхьэпэ мафэу,
ШэкIогъу мазэу,
УиныбжьыкIэгу гуIэм зэрихьэу,
Дунаим ихьылъэ о зытеплъхьагъ,
Угу ихъыкIрэр хэти ымышIэу
МэшIо тэпышхом узэлъиштагъ.
Пый мэхъаджэмэ ар топэу къа­хабдзи,
Тимамырныгъэ уфэбэнагъ!
Псэемыблэжьэу, лIыхъужъ-лIыбланэу
А мэфэ дэдэм о узeкIуагъ!
Гъэ мин тешIагъэми утщымыгъупшэу
ЩысэтexыпIэу тыгу укъинагъ!
Тыгъэ нэфынэу укъытфэблэнэу
Непэрэ мафэм ппсэ о фэптыгъ.
Псаоу непэ укъытхэмытми,
ЛIыхъужъыцIэр о къэблэжьыгъ!
Адыгабзэмрэ литературэмрэкIэ кIэлэегъаджэу Унэрэкъо Щамсэт.