Нахь макIэ хъугъэ

Гъэтхапэм и 9-м ехъу-лIэу зэфэхьысыжьхэм къызэрагъэлъэгъуагъэмкIэ, Урысыем COVID-19-р къызэузыхэрэм япчъагъэ процент 29,6-кIэ нахь макIэ щыхъугъ.


— 2022-рэ илъэсым иябгъо­нэрэ тхьамафэ изэфэхьысыжьхэмкIэ коронавирусыр нэбгырэ 616 355-мэ къяузыгъ, ар блэкIыгъэ тхьамафэм еб­гъапшэмэ, процент 29, 6-кIэ нахь макI, — къыIуагъ Роспотребнадзорым ипащэу Анна Поповам.

Роспотребнадзорым къызэриты­гъэмкIэ, ныбжь зэфэшъхьаф зиIэ купхэм зэкIэми узыр нахь макIэу къяутэкIэу агъэунэфыгъ. А. Поповам къызэрэхигъэщыгъэмкIэ, коронавирусыр зиIэу агъэунэфыгъэхэм япроцент 97-мэ пэтхъу-Iутхъум фэдэу е нэшанэ хэмы­лъэу апэкIэкIы.

Урысыем исубъекти 5-мэ сымаджэхэм япчъагъэ нахь за­къыщиIэтыгъэу агъэунэфыгъ. Ахэм ащыщых Москва, Санкт-Петербург, Московскэ хэкур.

Вакцинацием епхыгъэ игъэкIотыгъэ Iофтхьабзэр Урысыем щэкIо, ащ ыпкIэ хэлъэп. Къэралыгъом коронавирусым пэуцужьырэ вакцини 6 щатхыгъ: «Спутник V», «Спутник Лайт», «Спутник М», «ЭпиВакКорона», «ЭпиВакКорона-Н» ыкIи «КовиВак» зыфиIохэрэр.