«Адыгэ макъэм» иIофышIэхэм адыгабзэмкIэ диктантым зыфагъэхьазыры

Адыгабзэмрэ (черкесыбзэмрэ) тхыбзэмрэ я Мафэ ипэгъокIэу я IV-рэ Дунэе Iофтхьабзэу «АДЫГЭ ДИКТАНТ» зыфиIорэм зыфагъэхьазыры. Ащ икIэщакIох Дунэе Черкес Ассоциациер, Адыгэ къэралыгъо университетыр, Къэбэртэе- Бэлъкъар къэралыгъо университетыр. Мы илъэсым ар гъэтхапэм и 12-м атхыщт, мафэм сыхьатыр 12-м рагъэжьэщт.

Iофтхьабзэр лъэпкъыбзэм икъызэтегъэнэжьын, ар нахь цIыфыбэмэ зэрагъашIэ ашIоигъо хъуным фэлажьэ. Рес­публикэ гъэзетэу «Адыгэ макъэм» ныдэлъфыбзэм икъэухъумэн, изэгъэшIэн ипшъэрылъ шъхьаIэх. 2023-рэ илъэсым гъэзетым иапэрэ номер къызыдэкIы­гъэр илъэси 100 хъущт.

«Адыгэ диктантыр» зызэхащэрэм щегъэжьагъэу редакцием иIофышIэхэр ащ чанэу хэлажьэх. Мы илъэсыми зыщаушэтынэу ежэх. Пандемием ыпкъ къикIыкIэ мы аужырэ илъэсхэм ар онлайн шIыкIэм тетэу макIо.

ШIоигъоныгъэ зиIэ пстэури Iофтхьабзэм хэлэжьэнхэ амал яIэщт. Атхыщт текстыр тIоу гощыгъэщт. Апэрэр адыгабзэр дэгъоу зышIэхэрэм апай, адрэр ар зэзыгъэшIэнэу езыгъэжьэгъакIэхэм афытегъэпсыхьагъ. Шъхьадж ежь иIэ­рыфэгъур къыхихыщт. ЛъэкъуацIэр кIэтхэгъэныр шIокI имыIэу щытэп, зыкъэзыгъэлъэгъонэу фэмыехэм зыфае цIэр ратхэн алъэкIыщт — унэе кодхэр зэкIэми афашIыщтых. Ау анахь дэгъоу тхагъэхэм ацIэхэр къараIощтых.
Зэратхыщт ыкIи зэрауплъэкIущт шIыкIэр тхэныр рамыгъажьэзэ къафаIо­- тэщт. Диктантыр электроннэ почтэу adygkafedra@mall.ru е телефонэу 8-918-223-95-19-м и WhatsApp рагъэхьажьынэу щыт.
ДЕЛЭКЪО Анет.