Икъашъо — шэпхъэ шъхьаI

Адыгэ Республикэм и Къэралыгъо академическэ къэшъокIо ансамблэу «Налмэсыр» къэзыгъэдахэрэмэ ащыщ Хьакъуй Анжеликэ.

Искусствэр зыщагъэлъэпIэрэ унагъом ар щапIугъ. ИцIыкIугъом къыщегъэжьагъэу адыгэ къашъохэр шIогъэшIэгъоныгъ. Искусствэхэм я Мыекъопэ училищэ щеджэзэ дунаим щыцIэрыIо ансамблэу «Налмэсым» рагъэблэгъагъ.

— Къашъо пэпчъ гупшысэ хэхыгъэ фэсэшIы, — къеIуатэ Адыгэ Республикэм инароднэ артисткэу Хьакъуй Анжеликэ. – ГъэпсыкIэу яIэр сщыгъупшэрэп. Концертым сыхэлажьэ зыхъукIэ, къашъоу къэсшIырэр «Налмэсым» хэгъэщагъэу зэрэщытыр, ансамблэм зэрэдиштэрэр гукIэ къыхэсэгъэщы.

Пэсэрэ адыгэмэ ящыIэныгъэ къыхэхыгъэ къашъоу «Тыргъэтаор» илъэсыбэ хъугъэу «Налмэсым» къешIы. ЗэлъашIэрэ сурэтышI-модельерэу СтIашъу Юрэ ыдыгъэ шъуашэм техыгъэ къашъор балетмейстер цIэрыIоу Къулэ Амэрбый ыгъэуцугъ. Анжеликэ къашъор къы­шIызэ, лъэпкъ искусствэм ибаиныгъэ къыхигъэщыгъ.

Пкъыр ищыгъэу адыгэ бзылъфыгъэм иобраз артисткэм къызэIуихыгъ. ЛъапэкIэ зэрэуцурэр, къашъом тамэ зэрэритырэр лъэгъупхъэ.

Ансамблэм икъашъохэу «ЗэфакIу», «Удж-хъурай», «ШIуфэс къашъу», «Налмэсыр» къэшъо» зыфиIохэрэм, нэмыкIхэм А. Хьакъуир якIэщакIу. Къашъор къызэрэхидзэрэ шIыкIэм уеплъызэ, артисткэм IэпэIэсэныгъэу хэлъым узыIэпещэ. Инэплъэгъуи, изекIуакIи зэдештэх.

— Хьакъуй Анжеликэ гукIэ къэшъо, — къеIуатэ Урысыем, Абхъазым, Пшызэ язаслуженнэ артистэу, Адыгеим инароднэ артистэу, ансамблэу «Налмэсым» ихудожественнэ пащэу Хъоджэе Аслъан. – Сыд фэдэ къашъо концертым къыщишIыщтми, пэшIорыгъэшъэу дэгъоу зегъэхьазыры. Анжеликэ ансамблэм хэтхэм IэпыIэгъу зэрафэхъурэр, лъэпкъ къашъохэм купкIэу яIэм зэрэлъыIэсырэр къыхэзгъэщыхэ сшIоигъу.

Урысыем ишъолъыр пчъагъэхэм А. Хьакъуир ащы­Iагъ. «Налмэсым» хэтэу Тыркуем, Италием, Израиль, США-м, Иорданием, Бельгием, Францием, Ливан, Абхъазым, Китаим, нэмыкIхэм къащышъуагъ.

— Адыгэ лъэпкъыр итэкъухьагъэу дунаим щэпсэу, — еIо Хьакъуй Анжеликэ. — IэкIыб хэгъэгухэм тащыуджызэ, тилъэпкъ итарихъ, икъашъохэр зыфэдэхэр нахьышIоу ятэгъашIэх. Адыгэ шъуашэм идэхагъэ зырагъэпшэщтыр амышIэу къыкIэупчIэрэр бэ. Къыдгоуцохэзэ нэпэеплъ сурэтхэр атырахыныр лъэшэу ягуап.

«Налмэсыр» илъэс 85-рэ зэрэхъугъэм фэгъэхьыгъэ концертхэр ансамблэм Къыблэм, Темыр Кавказым къащитыгъэх. ЗэлъашIэрэ ансамблэу «Кабардинкэр» игъусэу Мыекъуапэ, Налщык зэкъошныгъэм ипчыхьэзэхахьэхэр ащызэхащагъэх. А. Хьакъуим зэлъэпкъэгъухэм яконцертхэр искусствэ лъагэм ишапхъэхэм адиштэхэу елъытэ. «ЗэфакIор», «Удж-хъураер», фэшъхьафхэри «Налмэсымрэ» «Кабардинкэмрэ» зэгъу­сэхэу къашIыгъэх. Пчыхьэзэхахьэхэр адыгэ джэгукIэ аухынхэр шэнышIу афэхъугъ.

Адыгэ бзылъфыгъэм, адыгэ хабзэм ядэхагъэ къа­шъохэмкIэ артистхэм къызэрагъэлъагъорэм мэхьанэшхо зэриIэр Хьакъуй Анжеликэ тизэдэгущыIэгъу къы­щыхигъэщыгъ.

Бзылъфыгъэхэм я Дунэе мафэ фэгъэхьыгъэ концертхэм «Налмэсым» зафегъэхьазыры. Хьакъуй Анжеликэ, иIофшIэгъухэм гъэхъагъэу яIэм хагъэхъонэу, мэфэкIыр гъэшIэгъонэу агъэкIонэу тафэлъаIо.