Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм фэгъэхьыгъэ концертхэр республикэм итворческэ купхэм зэхащэх.
Адыгэ Республикэм и Къэралыгъо филармоние и Къэралыгъо симфоническэ оркестрэ Къыблэ шъолъырым, Темыр Кавказым гъэтхапэм концертхэр къащитыщтых.
Щэрджэскъалэ культурэмкIэ и Унэшхо гъэтхапэм и 3-м юбилеим фэгъэхьыгъэ зэхахьэр щыкIощт. Къэбэртэе-Бэлъкъарым и Къэралыгъо музыкальнэ театрэ гъэтхапэм и 4-м симфоническэ оркестрэм концерт къыщитыщт.
Ставрополь къэралыгъо филармонием гъэтхапэм и 10-м, Къалмыкъым и Къэралыгъо филармоние гъэтхапэм и 12-м пчыхьэзэхахьэхэр ащыкIощтых.
— Адыгеим къэралыгъо гъэпсыкIэ иIэ зыхъугъэр игъэкIотыгъэу мыгъэ хэтэгъэунэфыкIы, — къытиIуагъ Адыгэ Республикэм и Къэралыгъо филармоние ипащэу, Урысыем изаслуженнэ артистэу, Адыгеим, Темыр Осетием — Аланием янароднэ артистэу Къулэ Мыхьамэт. — Адыгеим июбилей мэхьэнэ ин етэты. Лъэпкъым итарихъ гукIэ къыфэтэгъэзэжьы. Тикультурэ, шэн-хабзэхэр нахьышIоу зэдгъэшIэнхэм фэшI музыкальнэ искусствэм зетэгъэушъомбгъу. Тилъэпкъэгъухэу IэкIыб къэралхэм ащыпсэухэрэм, тигъунэгъу шъолъырхэм, къош республикэхэм талъэIэсы.
Республикэм исимфоническэ оркестрэ ихудожественнэ пащэр Урысыем изаслуженнэ артистэу, Къэбэртэе-Бэлъкъарым изаслуженнэ артистэу Темыркъэнэ Петр. Дирижер шъхьаIэр Адыгэ Республикэм изаслуженнэ артистэу Аркадий Хуснияров, дирижерыр – СтIашъу Къэплъан.
Симфоническэ оркестрэм иконцертхэм Адыгеим, Къэбэртэе-Бэлъкъарым, Къэрэщэе-Щэрджэсым якомпозиторхэм япроизведениехэр ащыIущтых. Композитор цIэрыIохэу Къэрдэнэ Хьэсан, Даур Аслъан, ХьаIупэ Джэбраил, Нэхэе Аслъан, Тхьабысымэ Умарэ, Анзорыкъо Чеслав, Сэмэгу Гощнагъо, КIыкI Хьисэ, нэмыкIхэм аусыгъэхэр симфоническэ оркестрэм къыригъэIощтых.
— Тилъэпкъ къыкIугъэ гъогур тимузыкальнэ искусствэ пытэу хэуцуагъ, — къеIуатэ Урысыем, Адыгеим, Къэрэщэе-Щэрджэсым янароднэ артистэу, Адыгэ Республикэм икомпозиторхэм я Союз итхьаматэу Нэхэе Аслъан. — Музыкэм лъэпкъхэр зэрэзэфищэхэрэр концертхэм къащыдгъэлъэгъощт.
Нартхэм афэгъэхьыгъэ рапсодиер, «Симфоническэ къашъохэр», нэмыкIхэу А. Нэхаим ыусыгъэхэр, Дж. ХьаIупэм, А. Даурым, У. Тхьабысымэм, фэшъхьафхэм япроизведениехэр искусствэр зыгу рихьыхэрэм зэхахыщтых. Концертхэм яплъыщтхэм Пушкинскэ картэхэр агъэфедэнхэ алъэкIыщт.
Сахьидэкъо Нурбый.