АР-м хэгъэгу кIоцI IофхэмкIэ и Министерствэ къеты

Сакъыныгъэ къызхэжъугъаф

Полицием цIыфхэм закъыфегъазэ общественнэ чIыпIэхэм зэращызекIощтхэм, хъугъэ-шIагъэ къэхъугъэу алъэгъумэ макъэ зэрагъэIущт шIыкIэхэм, нэмыкIхэми афэгъэхьыгъэу.

Iофтхьабзэхэу цIыфыбэ зыщызэхахьэхэрэм шъузэращызекIон фаер:

— общественнэ рэхьатныгъэр шъумыукъу;

— шъукъэзыуцухьэхэрэр гузэжъогъу ыкIи щынэгъо чIыпIэ изыдзэщтхэ шIыкIэхэр къызхэшъумыгъафэх;

— Iофтхьабзэр зэхэзыщагъэхэм, ащ хэлажьэхэрэм, рэхьатныгъэр ыкIи щынэгъончъагъэр къащызыухъумэхэрэм шъхьэкIафэ афэшъушI;

— машIор къэмыгъэхъугъэным ишапхъэхэр шъумыукъох;

— зыныбжь имыкъугъэхэ кIэлэцIыкIухэр шъуинэплъэгъу ишъумыгъэкIых;

— автотранспортыр хэушъхьафыкIыгъэ чIыпIэхэм къащыжъугъэуцу;

— шъуагъэкощынэу макъэ къызагъэIукIэ, бырсыр къэшъумыIэтэу, рэхьатэу зыфаIорэм шъукIу.

Адыгэ Республикэм ишъолъыр цIыфыбэ зыхэлэ­жьэщт Iофтхьабзэм изыфэгъэхьазырыгъом ыкIи ар зыщыкIорэ уахътэм общественнэ рэхьатныгъэр укъуа­гъэ мыхъуным фэшI хэбзэукъоныгъэ горэ шъулъэгъумэ телефонэу (8772)59-64-00-м е 02-м макъэ ежъугъэIун шъулъэкIыщт.

Мыцыхьэ­шIэгъу пкъыгъохэр зышъулъэгъухэкIэ шъузэ­рэзекIощтыр

ЦIыфыбэ зыщызэрэугъойхэрэ чIыпIэхэм ащыщ мыцыхьэшIэгъоу пкъыгъо зыщы­шъулъэгъукIэ, шъублэмыкI. Гъунэгъоу щытхэм ащыщ иемэ шъукIэупчI, полицием макъэ ежъугъэIу.

Зыщышъумыгъэгъупш:

— къэжъугъотыгъэ пкъыгъор къызэкIоцIышъумых ыкIи шъумыгъэкощы;

— пкъыгъор зиер, амал иIэмэ, зэжъугъашIэ;

— зиер къэшъумыгъотыгъэмэ, полицием макъэ ежъугъэIу;

— гъунэгъоу щыт цIыфхэм зэлъяжъугъашI мыцыхьэшIэгъу пкъыгъо зэрэщылъыр;

— нахь чыжьэу IукIынхэу яшъуIу.

Джыри зэ шъугу къэтэгъэ­кIыжьы!!!

Ны-тыхэр! ШъуикIэлэцIыкIухэм ящыIэныгъэкIэ ыкIи япсауныгъэкIэ шъоры пшъэдэкIыжь зыхьырэр. Ахэм агурыжъугъаIу урамым къытырагъотэрэ пкъыгъом щынагъо къыпыкIын зэрилъэкIыщтыр. Къэжъугъотырэ пкъыгъохэм шъхьафитэу шъуадэмызекIу.

Полицием цIыфхэм закъыфегъазэ общественнэ чIыпIэхэм зэращызекIощтхэм, хъугъэ-шIагъэ къэхъугъэу алъэгъумэ макъэ зэрагъэIущт шIыкIэхэм, нэмыкI­хэми афэгъэхьыгъэу.

ХъункIэн бзэджэшIагъэхэр дэгъэзыжьыгъэнхэм фэшI зыщышъумыгъэгъупш:

— ахъщэшхо ыкIи уасэ зиIэ мылъку зэрэшъуIы­гъыр общественнэ чIыпIэхэм къащызыхэшъумыгъэщ;

— чэщрэ унэм шъукъэкIожь зыхъукIэ, цIыфхэр макIэу зыщызекIохэрэ урамхэм шъуатемыхь;

— унэ пчъэIум шъукъызысыжьыкIэ, шъэфэу зышъуп­лъыхь мыцыхьэшIэгъу цIыф къышъулъэплъэмэ е щынэгъо нэшанэ горэ щыIэмэ;

— цыхьэ зыфэшъумышIэу ыкIи шъумышIэрэ цIыф куп подъезд Iупэм Iутэу шъузыIухьажьыкIэ, шъуаблэкIи унэм чIэс горэхэр къыIухьэжьыфэхэкIэ шъуяж;

— шъуимынэIуасэхэм лифтым шъуадимытIысхь;

— зыгорэ къышъулъыплъэу гу зылъышъутэкIэ, гъунэ­гъоу щыт тучан е нэмыкI сатыушIыпIэу цIыфыбэ зычIэтым шъучIахьи, полицием макъэ ежъугъэIу, а цIыфым итеплъэ зыфэдэр яшъуIу;

— къышъутебэнагъэхэмэ, бзэджашIэм итеплъэ горэхэр шъугу ишъуубытэх, шъушIуатыгъугъэр зыфэдэр къэшъуIотэжьын фае.

БзэджэшIагъэ къыжъудызэрахьагъэмэ

Шъуащыщ горэм хэбзэукъоныгъэ къыдызэрахьагъэмэ, полицием ителефон номерэу 02-мкIэ шъутеон шъулъэкIыщт.

Бэ тешъумыгъашIэу полицием макъэ ежъугъэIумэ бзэджашIэр нахь псынкIэу къаубытын алъэкIыщт. ШъулъэкъуацIэ, шъуцIэ, шъуятацIэ ыкIи шъузщыпсэурэ чIыпIэр яшъуIу. Хъугъэ-шIагъэр зыщыхъугъэ чIыпIэм шъуIумыкIыжьэу полицием икъулыкъушIэхэр къэкIофэхэ шъуяж.

ИгъэкIотыгъэу ыкIи шъыпкъагъэ хэлъэу зэкIэ къы­шъущышIыгъэр къулыкъушIэхэм яшъуIу. Нахьыбэ шъугу къэкIыжьэу афэшъуIуатэ къэси, бзэджашIэр нахь къэубытыгъошIу афэхъущт. Зыщышъумыгъэгъупш, лажьэ зырахыгъэм полицием макъэ зыримыгъэIукIэ, бзэджашIэм пшъэдэкIыжь ымыхьэу хэтыщт.

Хэбзэукъоныгъэ зышIагъэм итеплъэ, ищыгъын, ицуакъэ зыфэдэм (жакIэ, пакIэ тетмэ, ыкIышъо сурэт хэутыгъэ тешIыхьагъэмэ) шъунаIэ атешъудз.
БзэджэшIагъэр зылъэгъугъэм шъуелъэIуи, полициер къэкIофэ IушъумыгъэкIыжь. Яжэн ымылъэкIыщтмэ, ителефон номер, зыщыпсэурэ чIыпIэр къежъугъаIу.

Тхыгъэ е жэрыIо шIыкIэм тетэу дежурнэ частым зыфэжъугъэзэн шъулъэкIыщт. Ар къулыкъушIэхэм атхыщт ыкIи талон къышъуфыратхыкIыщт. Нэужым хъугъэ-шIагъэм епхыгъэу упчIэхэр къышъуатыщтых.

Ащ нэмыкIэу общественнэ рэхьатныгъэм икъэухъу­мэнкIэ полицием иучастковэ пунктэу къышъупэгъунэгъум зыфэжъугъэзэн шъулъэкIыщт.

Бэрэ ятыгъох

Анахьыбэу зэрахьэрэ бзэджэшIагъэхэм ащыщ автомобилым зэретыгъохэрэр. Автотранспортым хэт апчхэр хаутызэ, пчъэр Iуатхъызэ тыгъон бзэджэшIагъэхэр зэрахьэх.

Автомобилыр зиехэми ялажьэ ащ хэлъэу къулыкъу­шIэхэм алъытэ. Макъэ къэзыгъэIурэ пкъыгъор ямашинэхэм ахэм ахагъэуцорэп, яхьап-щыпхэр, мобильнэ телефонхэр, ахъщэр, документхэр къыранэх.

Мыщ фэдэ Iоф шъухэмыфэным фэшI АР-м хэгъэгу кIоцI IофхэмкIэ и Министерствэ автомобилыр зиехэм закъыфегъазэ ямылъку фэсакъынхэу, къаухъумэнэу.

Автомобилыр Iуамыфыным ыкIи ащ илъхэр рамытыгъукIынхэм фэшI шъушIэн фаехэр:

— автомобилым ипчъэ Iухыгъэу къэшъумыгъан ыкIи IункIыбзэр къыIушъумыгъан;

— цIыф макIэ зыщызекIорэ ыкIи нэфынэр зыдэщымыIэ чIыпIэхэм машинэр къаIушъумыгъан;

— чэщым шъуимашинэ гаражым чIэжъугъэуцу е ыпкIэ хэлъэу уцупIэм дэжъугъэуцу;

— осэ ин зиIэ хьап-щыпхэр ыкIи ахъщэр автомобилым къишъумыгъанэх.

Полицием зызэрэфэбгъэзэн плъэкIыщтыр

БзэджэшIагъэ е хъугъэ-шIагъэ горэ шъулъэгъугъэмэ е шъо шъушъхьэкIэ хэбзэукъоныгъэ къыжъудызэрахьагъэмэ, Адыгэ Респуб­ликэм хэгъэгу кIоцI IофхэмкIэ и Министерствэ макъэ ежъугъэIунэу зыкъышъуфе­гъазэ. Ар шIыкIэ зэфэшъхьафхэмкIэ пшIын плъэкIыщт.

Тхьапэм тептхэрэм итынхэ фаехэр:

1. Хэгъэгу кIоцI IофхэмкIэ къулыкъоу е ащ Iоф щызышIэу зызыфэбгъазэрэм ыцI, IэнатIэу ыIыгъыр.

2. Зафэзыгъазэрэм ылъэкъуацI, ыцI, ятэ ыцI.

3. Джэуапыр зыдагъэхьыжьыщт адресыр.

4. Ежь ышъхьэкIэ зэрэкIэтхэжьыгъэр ыкIи мафэу зитхыгъэр.

5. ЦIыфым ытхыгъэр къэзыгъэшъыпкъэжьырэ документхэр.

Къэзыгъэхьазырыгъэр КIарэ Фатим.