Нэбгырэ 44-рэ къэхъугъ

2021-рэ илъэсым ЭКО-м ишIуагъэкIэ республикэм сабый 44-рэ къыщыхъугъ.

АР-м псауныгъэр къэухъумэгъэнымкIэ и Министерствэ къызэритырэмкIэ, лъэпкъ проектэу «Демография» зыфиIорэм къыдыхэлъытагъэу ЭКО-р ыпкIэ хэмылъэу ашIы. Гъэ­рекIо бзылъфыгъэ 37-мэ арэущтэу сабый къафэхъугъ. Мы илъэсми про­граммэр щыIэныгъэм щыпхыращыщт. Адыгеим щыпсэухэрэм апае ЭКО-м епхыгъэ протоколи 130-рэ фэдиз ашIынэу агъэнафэ, щылэ мазэм нэбгыри 7-мэ ар афа­шIыгъ.


ЭКО-м ишIуагъэкIэ бзылъфыгъэ пчъагъэмэ сабый къафэхъу. Унагъом илъэсым къыкIоцI сабый къызыфэмыхъукIэ, илъэс 35-м ехъугъэхэм илъэсныкъом зышIокIыкIэ охътабэ тырамыгъашIэу ЭКО-р арагъэшIымэ нахьышIоу специалистхэм алъытэ.

ШIокI зимыIэ медицинэ страхо­ванием епхыгъэу Iоф зышIэрэ медицинэ организациехэр республикэм щыпсэурэ бзылъфыгъэхэм IэпыIэгъу къафэхъух. ЭКО-р къыпфашIыным пае ищыкIэгъэ уплъэкIунхэр, анализхэр, нэмыкI упчIэхэр зиIэхэр мы лъэныкъом епхыгъэ врачым е АР-м псауныгъэр къэухъумэгъэнымкIэ и Ми­нистерствэ ителефонэу 8(8772) 210-234-м (номер тедзэр 2062-рэ) теохэмэ, къараIощт.
(Тикорр.).