Джыри зы вакцинэ аушэты

Компаниеу «Генериум» зыфиIорэм ковидым пэуцужьырэ пэм раутхэрэ вакцинэу къыгъэхьазырыгъэм иклиническэ ушэтынхэр Москва щырагъэжьагъ. Ащ нэбгырэ 660-рэ хэлэжьэщт.

— Къалэм иполиклиники 6-мэ пэм раутхэрэ вакцинэм иушэтын ащаублагъ. Мыщ изэхэлъыкIэкIэ «Спутник V» зыфаIорэм ехьыщыр. Джащ фэдэу мыщ ыпаIокIэ Гамалея ыцIэ зыхьырэ ушэтыпIэ Гуп­ч­эм къыгъэхьазырыгъэ пэм раутхэрэ вакцинэм иушэтыни типоликлиникэхэм ащырагъэжьагъ, — къыIуагъ Мо­с­ква имэр игуадзэу Анастасия Раковам.

Ушэтынхэм ахэлэжьэщтхэр купитIоу агощыщтых. ШIоигъоныгъэ зиIэ пэпчъ а 1-рэ ыкIи я 21-рэ мафэм вакци­нэр уколэу ахалъхьащт ыкIи пэм афыраутхэщт. Зы купым аушэтырэ вакцинэр пэм афы­раутхэщт, ау ахалъхьащт уколымкIэ «плацебо» (Iэзэгъу зыхэмылъ вещество) агъэфедэщт. Адрэ купым «плацебо» зыфаIорэр пэм афыраутхэщт, вакцинэу «Спутник V-р» ахалъхьащт. Ушэтынхэм ахэлажьэхэрэм илъэс­рэ врачхэр алъыплъэщтых.

Ушэтынхэр рамыгъажьэ­хэзэ, ахэм ахэлажьэхэрэм япсауныгъэ изытет ауплъэкIу. COVID-19-м пэуцужьырэ вакцинэр зыхэмылъэу ыкIи зысымэджагъэм илъэсныкъо тешIагъэу, илъэс 18 — 60 зыныбжьэу шIоигъоныгъэ зиIэ пстэури ушэтынхэм ахэлэжьэнхэ алъэкIыщт.

Клиническэ ушэтынхэм ахэлажьэ зышIоигъохэм мы сайтымкIэ зыхарагъэтхэн алъэкIыщт: Vac_gnr@zdrav.mos.ru».