Медаль къэзымыхьыгъэ ахэтэп

Къыблэ шъолъырым ушу-саньдамкIэ изэнэкъокъу Ростов-на-Дону мэзаем и 4 — 7-м щыкIуагъ. БэнэкIо 200 фэдиз хэлэжьагъ.

НыбжьыкIэхэр ыкIи зыныбжь икъугъэхэр якупхэм ахэтхэу зэ­IукIэгъухэм яIэпэIэсэныгъэ къащагъэлъэгъуагъ.


Адыгэ Республикэм испорт еджапIэу N 2-м зыщызыгъэсэрэ бэнэкIуи 8 алырэгъум щянэ­къо­къугъ, зэкIэми медальхэр къа­хьыгъэх. Апэрэ чIыпIи 4-р къызыфагъэшъошагъэхэм шъуащы­тэгъэгъуазэ.

Анна Вапельник, кг 52-рэ, Вилена Парамонова, кг 60, Кристина Морозова, кг 70-рэ, Га­джимурад Муртазалиев, кг 70-рэ.

Кристина Морозовар Урысыем ихэшыпыкIыгъэ командэ хэт, Адыгэ Республикэм испортсмен анахь дэгъуи 10-у 2021-рэ илъэсым къыхахыгъэмэ ащыщ. Хэгъэгу ыкIи дунэе зэIукIэгъухэм медальхэр къащихьыгъэх.

ЯтIонэрэ чIыпIэхэр къыдэзыхыгъэхэм тыжьын медальхэр къа­фагъэшъошагъэх. Дышъэр къэзы­хьын зылъэкIыщтхэм ахэр ащыщыгъэх.

Алена Вапельник, кг 56-рэ, Олеся Толстых, кг 60, Давит Саргсян, кг 52-рэ, Заур Маго­медовым, кг 65-рэ, тафэраз.

Адыгэ Республикэм изаслу­женнэ тренерэу НэмытIэкъо Ас­кэрбый тиспортсменхэр егъасэх.

— Щытхъур къытфэзыхьыгъэ бэнакIохэм тагъэгушIуагъ, — къы­тиIуагъ НэмытIэкъо Аскэрбый. — Кристина Морозовам нэмыкI бэнэкIуитIуи ацIэ къесIо сшIоигъу. Анна Вапельник ыкIи Заур Магомедовым щысэшIу къагъэлъэгъуагъ.

Анна Вапельник Урысыем изэ­нэкъокъу дышъэр къыщызыхьыгъэ пшъашъэу Краснодар краим къи­кIыгъэм текIуагъ. Адыгэ Рес­публи­кэм щыщ пшъашъэм тренер­хэм, спортсменхэм анаIэ къы­ты­ра­дзагъ.

Заур Магомедовыр финалныкъом дэгъоу щыбэнагъ. Ылъакъо шъобж тещагъэу текIоныгъэр къыдихыгъ. Узым ыгъэгумэкIыщты­гъэми, З. Магомедовыр апэрэ чIыпIэм пхъашэу фэбэнагъ, ды­шъэм пэблагъэ хъугъагъэ.

Адыгэ Республикэм испорт еджапIэу N 2-м ипащэу, Урысыем, Адыгеим язаслуженнэ тренерэу Хъот Юныс зэхэщэн Iофыгъохэр дэгъоу зэригъэцэкIагъэхэм фэшI ушу-саньдамкIэ тибэнакIохэр къы­фэразэх. Зичэзыу зэнэкъокъухэм агу етыгъэу зафагъэхьазыры.