Узым тызэдебэнын фае

Вирус ыкIи микроб зэфэшъхьафхэм апкъ къикIэу цIыфыр сымэджэн ылъэкIыщт. Узэу къежьагъэр къытпымыхьэзэ, ащ пэшIуекIощт Iофыгъо­хэр дгъэцакIэхэмэ нахь тэрэз.

ЦIыфыр къызысымаджэкIэ зыдакIорэр сымэджэщыр ары, ау ащ Iофыр нэмысызэ коронавирусым пэуцужьырэ вакцинэр зыхябгъэлъхьан плъэ­кIыщт. Коронавирусым зэкIэми тызэребэнын тлъэкIыщт ама­лэу вакцинациер зэрэщытыр емызэщхэу къытаIо тикъэра­лыгъо ипащэхэм, шIэныгъэлэжьхэм, медицинэм иIофышIэхэм, къэбар жъугъэм иамалхэм къа­щыхауты.

Иягъэ екIынэу уз уимыIэмэ, вакцинэу коронавирусым пэшIуекIон зылъэкIыщтыр зыхябгъалъхьэмэ нахь тэрэзэу сэри сэлъытэ. Тиунагъо исхэмкIэ коронавирусым пэуцужьырэ вакцинэм иапэрэ хэлъхьэгъу мэкъуогъум и 1-м ядгъэшIыгъ. ЯтIонэрэр — мэкъуогъум и 15-м. Уахътэ зытешIэм, гриппым ыкIи пэтхъу-Iутхъум апэшIуекIорэ вакцинэр зыхядгъэлъхьагъ. ЕтIани охътэ заулэкIэ пневмонием пае препаратэу Провинар-13-р зыхядгъэлъхьагъ. Мэзих зэхъум, тыгъэгъазэм и 14-м ревакцинацие тиунэ тыщашIыгъ. «Тхьашъуегъэпсэу» ятэIо Теуцожь район сымэ­джэщым иврач шъхьаIэу Къат Зурет, а сымэджэщым иврач-­терапевтэу Дыхъу Ирмэ, Нэ­шъукъое фельдшер-мамыку IэзапIэм ипащэу Блэгъожъ Розэ, машинэкIэ ахэр къэзыщагъэу Апсэлямэ Юсыф.

Сэ илъэс 75-рэ сыныбжь, сишъхьэгъусэ — 72-рэ, уз го­рэ­хэри тимыIэу щытэп, ау вак­цинэу зыхядгъэлъхьагъэмэ яягъэ къытэкIыгъэу щытэп.

ЗыIонхэр къыхэкIынкIи мэхъу: «Мощ фэдиз вакцинэр сыдым пае мы унагъом исхэм зыхарагъэлъхьагъа?» Ар бгъэшIэ­гъонэу щытэп, арэущтэу щытын фаеу еплъыкIэ фытиI. Сыда пIомэ, 2017-рэ илъэсым сэ сшъхьэкIэ пневмониер спэкIэ­кIыгъ, ихьылъагъэ къызгурэIо.

Узыр зыфэдэр къэоIокIи е къэотхыкIи пшIошъы хъурэп о къыппымыхьагъэ зыхъукIэ. Ар къыоузыныр хэгъэкIи, угу къэ­кIыжьыныр щынагъоу щыт. КъысэIэзагъэх, сэри сызэIэзэ­жьыгъ. Гъунэ имыIэу сафэраз Алахьым, врачхэм. Ары коронавирусым зэкIэми тызэдебэнын фаеу цIыфхэм зыкIясIорэр, гъэзетым къызыкIэстхы­рэри. Сыд фэдэ эпидемие щы­Iэми, узэгъусэу упэуцужьын, вакцинэу пэшIуекIон зылъэкIыщтыр зыхябгъэлъхьан фае.

Коронавирусыр нахьыбэу зы­щызэпахэу зыфаIорэр цIыф­хэр жъугъэу зыщызэIукIэхэрэ чIыпIэхэр ары: нысащэр, хьадагъэр, нэмыкIхэр.

КIалэмрэ пшъашъэмрэ «тызэдыщыIэщт, тызэдэпсэущт, ты­зэгурыIощт, унагъо зэдэт­шIэщт, сабыйхэр зэдэтпIущт» аIонышъ, зэIукIэнхэр насыпыгъ. Нысащэм хэлажьэхэмэ ашIоигъу Iахьыл-благъэхэр, ныбджэгъухэр, гъунэгъухэр, нэмыкIхэри, ау коронавирусым ыпкъ къикIыкIэ нысащэм икъу фэдизэу хэмылажьэрэм угу ебгъэнэу щытэп.

ШIу зэрэлъэгъоу зэIукIэгъэ нэбгыритIум къагурыIон фае шъхьэкIэфэныгъэу, гукIэгъуныгъэу, шIулъэгъуныгъэу зэфыряIэщтыр нысащэм хэлажьэрэ нэбгырэ пчъагъэм, ар зыщырекIокIырэ чIыпIэм зэрямы­лъытыгъэр. Ежьхэм зэгурыIоныгъэу азыфагу илъыщтыр ары анахь шъхьаIэр.

ЦIыфыр дунаим ехыжьыгъ. Унагъом щыпсэурэ цIыфхэмкIи, Iахьыл-благъэхэмкIи ар къинышху. Ислъам диным ишапхъэхэр дгъэцакIэхэзэ дунаим ехыжьыгъэр дгъэкIотэжьын фае, ау къекIокIырэ узым пае тызыфэсакъыжьызэ, хьадагъэм ишапхъэхэр дгъэцэкIэнхэ фаеу щыт. Шэн-хабзэхэу щыгъын Iухыжь, мэфэ тIокIитIу, илъэс Iан зыфатIохэрэр мы охътэ хьылъэм унэгъо кIоцIым щы­зэ­хащэхэмэ нахь тэрэз.

Унагъоу зицIыфышъхьэ машинэ зэутэкIым хэкIодагъэм, коронавирусым е фэшъхьаф узым апкъ къикIыкIэ дунаим ехыжьыгъэм мэфэ заулэ нахь темышIагъэу ыдэжь укIонышъ къыпфишIэу сыдэущтэу ущы­шхэщта? КъызгурыIорэп!

Сэдакъэр ары псапэ зыхэ­лъыр. Мылъкоу унагъом иIэм елъытыгъэу ар рекIокIымэ нахь тэрэз. Мылъку уиIэмэ, ащ гъунапкъэ зыми фишIырэп. Адыгэмэ аIо: «Гум пыкIырэр пэкIэжьы».

Ефэндхэм, Iимамхэм зэшIуа­хырэр Iоф псынкIэп. Сыд фэ­дэрэ IофшIэн агъэцакIэми, ощхыми, осыми, фабэми, чъы­Iэми, къин щыIэу макъэ зяд­гъэIукIэ, ахэр къин зиIэ уна-гъом дэжь игъом екIуалIэх.

Мыщ дэжьым ефэндыр унагъоу къин зиIэм щыпсэурэ цIыф­хэм, Iахьыл-благъэхэм яушъыин ылъэкIынэу амал иI.

Гриппым, пэтхъу-Iутхъум, коронавирусым янэшанэхэр къытэузыгъэхэу гуцаф зыфэтшIыжьымэ, медицинэ IэпыIэгъу псынкIэм макъэ едгъэIуным, вакцинэм иягъэ екIынэу уз ти­мыIэмэ, ар зыхядгъэлъхьаным мэхьанэшхо иI. А пстэури дгъэ­цакIэмэ, коронавирусым нахь зыщытыухъумэн тлъэкIыщт. Ала­хьэм еIо: «Ори зыфэса­къыжь, сэри сыкъыпфэса­къыщт».

Медицинэм иIофышIэхэу коронавирусыр къызпыхьэгъэ сы­маджэхэм яIазэхэрэм къинэу алъэгъурэр икъу фэдизэу къызгурэIо. Ежьхэри мысымэджэнхэу, зэIазэхэрэ цIыфхэми ягъэ­хъужьын псынкIэ къафэхъунэу сафэлъаIо.

2022-рэ илъэсым цIыфмэ псауныгъэ пытэ яIэнэу, насып дахэ къафихьынэу, коронавирусыри тхэкIыжьынэу сафэлъаIо.

КIыкI Вячеслав.
Егъэджэн-пIуныгъэм иветеран.
Нэшъукъуай.