Рэхьатэу аухыгъэп

«Луч» Москва — «АГУ-Адыиф» Мыекъуапэ — 25:25 (11:13).
Мэзаем и 7-м Москва щызэIукIагъэх.

«АГУ-Адыиф»: къэлэпчъэIутхэр: Баскакова, Ламзина; ешIа­кIохэр: Клименко — 1, Краснокутская — 3, Кириллова — 1, Колодяжная, Мещерякова — 8, Морозова, Куцевалова — 5, Казиханова — 2, Казанджян, Поршина, Краснова — 1, Кобл — 3.

БэмышIэу гандбол командитIур Мыекъуапэ зыщызэдешIэхэм, «Лучым» текIоныгъэр ­ыхьыгъ. Москва щыкIогъэ зэIукIэгъум икIэух гъэшIэгъоныгъ. Зэнэкъо­къур зырагъажьэм пчъагъэр зэ­рэ­лъыкIуатэщтыгъэр: 1:4, 4:8, 6:10, я 28-рэ такъикъым 10:13, хъугъэ, я 35-рэ такъикъым ешIэгъум ипчъагъэ зэфэдизыгъ — 13:13.

Москва иешIакIохэр нахьыбэрэ апэкIэ къилъыхэу фежьагъэх. Пчъагъэр 18:14 хъугъэ, «Лучым» ехьы. Я 50-рэ такъикъым 23:20, такъикъи 5 зытешIэм 25:21-рэ хъугъэ. ТекIоныгъэр «Лучым» ыхьыщтэу мэгугъэ.

«Адыифым» зигъэрэхьатырэп. Я 55-рэ, 57-рэ, 58-рэ такъикъхэм Виктория Мещеряковам «Лучым» икъэлапчъэ Iэгуаор дедзэ — 25:24-рэ. В. Мещеряковам ухъумакIор къызэринэкIи, хъагъэм Iэгуаор ридзагъ — 25:25-рэ. Таблом уахътэм къыгъэлъагъорэр 59:03. «Лучыр» гуIэм хэтэу ыпэ­кIэ къилъыгъ. В. Юриченковар тикъэлапчъэ лъэшэу къы­дэуагъ. Л. Баскаковам зидзи, лъакъокIэ Iэгуаор къызэкIидзэ­жьыгъ.

«Адыифыр» псынкIэу ыпэкIэ лъыкIотагъ. НэгъэупIэпIэгъуи 2 къэнагъэу В. Мещеряковар къэлапчъэм зыдаом, «Лучым» иухъу­макIо шапхъэхэр ыукъуагъэх. Судьям тазырыр ыгъэунэфыгъ. В. Мещеряковар икIэрыкIэу къэлапчъэм зыдаом, ухъумакIомэ якуп хэт пшъашъэм Iэгуаор тефи, къызэкIидзэжьыгъ. ЗэIукIэгъур 25:25-у аухыгъ.

Мэзаем и 12-м «Адыифыр» «Уфа-Алиса» Уфа Мыекъуапэ щыIукIэщт.

ЧIыпIэхэр

Купэу «Б-р»
1. «Динамо» — 26
2. «Университет» — 19
3. «Ставрополь» — 14
4. «Агу-Адыиф» — 12
5. «Луч» — 10
6. «Уфа-Алиса» — 5.
Сурэтым итыр: Виктория Мещеряковар.