Апэрэ гъэхъагъэхэр ащыгъупшэщтхэп

Къоджэ спортым зегъэушъом­бгъугъэным епхыгъэ Iофтхьа­бзэхэр Щынджые щызэхащэх.

КIэлэеджакIохэр баскетбол, волейбол, футбол ешIэх. СамбэмкIэ, шъхьафит бэна­кIэмкIэ, нэмыкIхэмкIи тренерхэр япащэхэу яIэпэIэсэныгъэ хагъахъо.
Тренерэу Бэгугъэ Мыхьарбый шъхьафит бэнакIэмкIэ кIалэхэр егъасэх. Тэхъутэмыкъое районым, Адыгэ Республикэм ащыкIорэ зэнэкъокъухэм кIэлэеджакIохэр ахэлажьэх, хагъэунэфыкIырэ чIыпIэхэр къыдахых.

Адыгэ Республикэм шъхьафит бэнакIэмкIэ изэIухыгъэ зэнэкъокъоу Бжыхьэкъоежъым щызэхащагъэм 2010 — 2011-рэ илъэсхэм къэхъугъэ кIалэхэр хэлэжьагъэх. Тэчахъо Айдэмыр, кг 32-рэ, Мамый Дамир, кг 38-рэ, ятIонэрэ чIыпIэхэр къахьыгъ.

Мамый Адам, кг 24-рэ, Тэчахъо Тимур, кг 26-рэ, Цуужъ Имран, кг 36-рэ, Бэгугъэ Тимур, кг 34-рэ, Бэрэтэрэ Аслъамбый, кг 34-рэ, Батмэн Азэмат, кг 36-рэ, ящэнэрэ чIыпIэхэр къафагъэшъошагъэх.

— Апэрэу медальхэр къэзыхьыгъэхэр кIэлэеджакIохэм ахэтых. ЯгушIуагъо зэдагощызэ, къыкIэлъыкIощт зэнэкъокъухэм зафагъэхьазыры, — къытиIуагъ тренерэу Бэгугъэ Мыхьарбый.

КIэлэегъаджэхэр, ны-тыхэр, лъэкI зиIэхэр тренерым IэпыIэгъу къыфэхъух. БэнапIэм зыщызыгъасэхэрэм лъэпкъ шэн-хабзэхэр щыIэныгъэм щызэрахьэх, япсауныгъэ агъэпытэ. Спортым зэфищэгъэ кIэлэеджакIохэр ныбджэгъу зэфэхъух.