РевакцинациемкIэ агъэфедэщт

Гамалея ыцIэ зыхьырэ ушэтын Гупчэм къыгъэхьазырыгъэ коронави­русым пэуцужьырэ пэм рагъахъорэ вакцинэр ревакцинациемкIэ агъэ­федэнэу зэрэрахъухьэрэр УФ-м псауныгъэр къэухъумэгъэнымкIэ и Министерствэ къыщаIуагъ.

ВакцинакIэм зэкIэ клиническэ ушэтынхэр зикIухэу ыкIи затхыкIэ, ащ игъэфедэн рагъэ­жьэщт.

Министерствэм ипресс-къулыкъу къызэритыгъэмкIэ, Гуп­чэм клиническэ ушэтынхэр ышIынхэм пае сомэ миллиони 187,8-рэ ратыщт. Ащ фэгъэ­хьыгъэ унашъом УФ-м и Правительствэ и Тхьаматэу Михаил Мишустиныр кIэтхэжьыгъ. Джащ фэдэу апэрэ ыкIи ятIонэрэ едзыгъо ушэтынхэр ныбжь зиIэхэм ащауплъэкIущтых.

— Пэм рагъахъорэ вакцинэу «Спутник V-р» зэрэщынэгъончъэр ыкIи шIуагъэ къызэрихьырэр рашIылIэщт ушэтыным къыгъэлъэгъощт. ЦIыфхэм COVID-19-р къямыузынымкIэ ыкIи япсауныгъэ къэухъумэгъэнымкIэ препаратхэм япчъагъэ зэрахагъахъорэм ишIуагъэ къэкIощт, — къыхигъэщыгъ УФ-м псауныгъэр къэухъумэ­гъэнымкIэ иминистрэ иIэпыIэгъоу Алексей Кузнецовым.

Гупчэм ипащэу Александр Гинцбург къызэриIуагъэмкIэ, адрэ къызэрыкIо вакцинэм ишIын мы вакцинакIэм щигъэзыерэп, узым пэуцужьынымкIэ ащ ихэгъэхъожьынэу щыт. ШIэныгъэлэжьым игущыIэхэмкIэ, пэм рагъахъорэ вакцинэр пэ кIоцIым ихьанэу ежьэгъэ вирусым пэуцужьызэ, пкъынэ-лынэм хигъахьэрэп.