Псы къабзэр зэкIэми анэсынэу

УФ-м и Президентэу Владимир Путиныр кIэщакIо зыфэхъугъэ лъэпкъ проектхэм ащыщ «ПсэупIэр ыкIи къэлэ щыIакIэр» зыфиIорэр.

Адыгеим ащ къыдыхэлъытагъэхэр щыпхырыщыгъэнхэм фэшI щаштагъ шъолъыр проектэу «Чистая вода» зыфиIорэр.

АР-м псэолъэшIынымкIэ, транспортымкIэ, псэупIэ-ком­мунальнэ ыкIи гъогу хъызмэтымкIэ и Министерствэ тызэ­рэщигъэгъозагъэмкIэ, 2024-рэ илъэсым нэс республикэм исым ипроцент 87,1-мэ псы къабзэ аIэкIэгъэхьэгъэнэу шъо­лъыр проектым къыщеIо. 2022-у тызыхэхьагъэм процент 81,9-м нагъэсын гухэлъ яI.

Республикэм икъалэхэм адэс­хэм япроцент 92,1-мэ шап­хъэхэм адиштэрэ псы къабзэ аIэкIэгъэхьэгъэнэуи проектым къыдыхэлъытагъ. Мыгъэ процент 90,9-м афашIыщт. Джащ фэдэу 2024-рэ илъэсым нэс псы къабзэ къэзытырэ псэолъэ 24-рэ агъэуцущт е агъэкIэжьыщт. Ахэм ащыщэу 14-р 2022-м ашIынэу агъэнэфагъэхэм къахеубытэх.

БлэкIыгъэ 2021-рэ илъэсым шъолъыр проектым къыдыхэ­лъытагъэу псэолъи 4 агъэуцугъ е агъэцэкIэжьыгъ. ПстэумкIи ащ сомэ миллион 31,8-рэ пэIуа­гъэхьагъ, ащ щыщэу сомэ миллион 31,4-р федеральнэ бюджетым къыхэхыгъ. Мы ахъщэмкIэ Красногвардейскэ районым ит къуаджэу Улапэ псыкъычIэщыпIэ щашIыгъ. Сомэ миллион 12-м ехъу ащ тефагъ. Минис­терствэм къызэрэщаIуагъэмкIэ, ащ фэдэ псэуалъэу къуаджэм дэтым ыкIуачIэ зэримыкъурэм къыхэкIыкIэ, псыр зэкIэ дэсхэм икъоу аIэкIахьэщтыгъэп.

Адыгэкъалэ щыпсэухэрэм псы къабзэ аIэкIэзгъэхьащт псэуа­лъэхэри гъэрекIо мы проектым къыдыхэлъытагъэу агъэ­псыгъэх. Ащ иурамэу Лениным ыцIэ зыхьырэм тет унэу 1А-м щашIыгъэм сомэ миллиони 5,3-рэ, мы урам дэдэм тет унэу 21Б-м щагъэпсыгъэм сомэ миллиони 6,5-рэ апэIухьагъ, урамэу Дружбэм тет унэу 48 Б-м щагъэпсыгъэм сомэ миллиони 4,5-рэ тефагъ.

Мыхэм псыр къэзытырэ оборудованиеу ащагъэфедэхэрэр жъы зэрэхъугъэхэм къыхэкIыкIэ, уешъон умылъэкIынэу хъугъагъ. Министерствэм къызэрэщаIуагъэмкIэ, псы къычIэщыпIэхэр кIэу ашIыгъэх, насосхэр зэбла­хъугъэх, бактериехэм ащызыухъумэщт псэуалъэхэр ащагъэу­цугъэх. Адыгэкъалэ ипсэупIэ кой хэхьэрэ къуаджэу Псэкъу­пси гъэрекIо псыр зыщаугъоирэ псэуалъэ щашIынэу рагъэ­жьагъ. Ащ сомэ миллиони 3,3-рэ пэIуа­гъэхьащт.

Мыгъэ псы къабзэм икъэтын епхыгъэу псэолъи 8 ашIынэу агъэнэфагъ. Ахэм сомэ миллион 12 апэIуагъэхьащт. Псэ­къу­псэ щырагъэжьагъэри мыгъэ аухыщт.

Теуцожь районым ит къуа­джэу Джэджэхьаблэ ыкIи къутырэу Городскоим псыкъычIэщыпIэу адэтхэр агъэкIэжьыщтых. Сомэ миллион 16,3-рэ ахэм атефэщт. Мы псэупIэхэм япсыкъычIэщыпIэхэр жъы зэ­рэхъугъэхэм къыхэкIыкIэ, псэу цIыф­хэр зашъохэрэр санитарнэ шап­хъэхэм адимыштэжь хъугъэ.

Джащ фэдэу мы район дэдэм ит къуаджэу Гъобэкъуае, къутырэу Шевченкэм кIэу къы­чIэщыпIэхэр ащашIыщтых. Къуа­джэм щагъэпсыщтым мыгъэ сомэ миллион 19,3-рэ пэIуагъэ­хьащт, къутырым щашIыщтым сомэ миллион 13,5-рэ тефэщт. Мыхэм псэуалъэу адэтхэм Iоф ашIэ, ау акIуачIэ зэримыкъурэм къыхэкIэу зэкIэми псыр икъоу аIэкIахьэрэп.

Тэхъутэмыкъое районымкIэ Яблоновскэ псэупIэ коим ха­хьэрэ поселкэу Новэм иво­дозабори жъы хъугъэшъ, мы илъэсым икIэрыкIэу ашIыжьыщтхэм ащыщ, сомэ миллион 12,1-рэ пэIухьащт.

Мыекъуапэ псы къабзэм икIуа­пIэхэр щагъэпсыщтых. Зыр — къалэм хахьэрэ поселкэу Родниковэм, ащ сомэ миллион 69,7-рэ тефэщт, адрэр — станицэу Ханскэм итемыр къо­хьэпIэ лъэныкъокIэ щысхэм апае агъэпсыщт, сомэ миллион 31,1-рэ пэIуагъэхьащт. Мыхэм районыкIэхэр ащагъэпсых, псыр аIэкIахьэрэп.

2022-рэ илъэсымкIэ IофшIэнэу агъэнэфагъэхэм пстэумкIи сомэ миллиони 184,3-рэ апэ­Iуагъэхьащт. Ащ щыщэу сомэ миллиони 182,3-р федеральнэ ахъщ.

ХЪУТ Нэфсэт.