«Омикроным» инэшанэхэр

Зэпахырэ узэу коронавирусым иштаммыкIэу  «омикроныр» къыппыхьагъэмэ къызэрэпшIэщт нэшанэхэр врачэу Александр Мясниковым и Telegram-канал къыщыхиутыгъ.

Медикэу ыкIи зэлъашIэрэ телеведущэм ишIошIыкIэ, Урысыем щыпсэухэрэм «омикрон» штаммыр шIэхэу апэкIэкIыщт. Зыхэм къяхьылъэкIыщт, адрэхэм къафэпсынкIэщт ыкIи IэпыIэгъу псынкIэм къеджэнхэ ищыкIэгъэщтэп.

— Пэтхъу-Iутхъур ыкIи вируснэ инфекцие къытэузыгъэ пае врачхэм зафэдгъазэрэп, игъорыгъозэ ар текIы. Джащ фэд COVID-19 иштаммхэри, процент 90-р ежь-ежьырэу зэIэзэжьых, — къыуIагъ докторым.

Врачым укъызщеджэн фаеу Мясниковым къыхигъэщыгъэ нэшэнищыр:

  1. Рэхьатэу ущысэу жьы умыгъотымэ е IофшIэн мыхьылъэ пшIагъэми узэIуехьэмэ;
  2. Плъыр-стырыр градус 38-м ехъу мэфэ заулэрэ зыуиIэкIэ;
  3. Пульсометрэм процент 94-м нахь макIэ къызигъэлъагъокIэ.

Джащ фэдэу, коронавирусымкIэ сымаджэхэр ежь-ежьырэу зыфэе Iэзэгъу уцхэр зэрахьылIэнхэр зэрэщынагъор Мясниковым хигъэунэфыкIыгъ. Ащ зигугъу къышIыгъэхэр антибиотикхэр, гормон уцхэр ыкIи лъыр зыгъэпIуакIэхэрэр.