ГъэрекIо Iофэу ашIагъэр зэхэсыгъом щызэфахьысыжьыгъ

ОшIэ-дэмышIэ тхьамыкIагъохэм къыздахьыхэрэр дэгъэзыжьыгъэнхэмкIэ къэралыгъо системэ зыкIым Адыгэ РеспубликэмкIэ ичIыпIэ подсистемэ 2021-рэ илъэсым Iофэу ышIагъэр республикэм и Правительствэ зы­чIэт унэм щыкIогъэ зэхэсыгъом тыгъуасэ щызэфахьысыжьыгъ. Адыгеим и ЛIышъхьэу КъумпIыл Мурат ащ хэлэжьагъ.

Джащ фэдэу Iофтхьабзэм хэлэжьагъэх Адыгэ Республикэм и Къэралыгъо Совет — Хасэм и Тхьаматэ игуадзэу Шъао Аскэр, республикэм и Премьер-министрэ ипшъэрылъхэр зыгъэцэкIэрэ КIэрэщэ Анзаур, Адыгеим иминистрэхэм я Кабинет хэтхэр, Урысыем и МЧС Адыгэ РеспубликэмкIэ и ГъэIорышIэпIэ шъхьаIэ, рес­публикэм и МВД, ресурсхэр аIэкIэзыгъэхьэрэ предприятиехэм, муниципальнэ образованиехэм япащэхэр.

Республикэм ипащэ зэхэсыгъом зэрэщыхигъэунэфыкIы­гъэмкIэ, чIыпIэ подсистемэм иухьазырыныгъэ зыкъегъэIэтыгъэныр хэбзэ къулыкъу пстэуми япшъэрылъ шъхьаIэу щыт.
«ЦIыфхэри чIыпIэхэри ошIэ­-дэмышIэ тхьамыкIагъохэм ащызыухъумэрэ республикэ къулыкъухэм зэдырагъаштэу, зэпыу имыIэу Iоф ашIэн фае. МэшIогъэкIуасэхэми, цIыфхэм якъэгъэнэжьын фэгъэзэгъэ къулыкъухэми фэныкъохэм ящыкIэгъэ IэпыIэгъур охътэ кIэкIыкIэ арагъэгъотынымкIэ амалхэр зэкIэ зэрахьанхэ фае. Ащ пае джырэ шапхъэхэм адиштэрэ техникэр щыIэн, IофышIэхэм яухьазырныгъи зыкъегъэIэты­гъэн фае», — къыIуагъ КъумпIыл Мурат.

Республикэм и ЛIышъхьэ къызэрэхигъэщыгъэмкIэ, гъэ­рекIо Адыгеим имэшIогъэкIосэ къулыкъухэми, цIыфхэм якъэгъэнэжьын фэгъэзэгъэ къулыкъухэми аIутхэм япшъэрылъ-
хэр дэгъоу агъэцэкIагъэх. Рес­публикэм машIоу зыкъыщызы­штэрэр процент 38-кIэ къе­Iы­хыгъ. МэшIогъэкIуасэхэми, цIыф­хэм якъэгъэнэжьын фэгъэ­зэгъэ къулыкъухэм ахэтхэми нэбгырэ 426-рэ къагъэнэжьыгъ.

Гъогум епхыгъэ къулыкъухэм, мэшIогъэкIуасэхэм, электрикхэм, хэбзэухъумэкIо къулыкъухэм яIофышIэхэм акIуачIэ зэдырахьылIэзэ мэзаем осы­шхоу къесыгъагъэхэм къыз­дахьыгъэхэр дагъэзыжьынхэ алъэкIыгъ. Ощхышхохэм апкъ къикIыкIэ республикэм иму­ниципалитетхэм яхэпIи 100-м ехъу­мэ мэкъуогъум псыр къазыкIаом, къулыкъухэмрэ ве­домствэхэмрэ зэдырагъаштэзэ Iофым хэкIыпIэ къыфагъотын алъэкIыгъ. ТхьамыкIагъом зэрар зэрихыгъэхэм апае Адыгэ Республикэм иминистрэхэм я Кабинет иIэпэчIэгъэнэ фонд сомэ миллион 1,5-м ехъу къыхагъэкIыгъагъ.

Хьаджэхъу тIокIэ зэжъум дэжь псыхъоу Шъхьэгуащэ зекIо нэбгырищ жъоныгъуакIэм зэрэхэкIодагъэм къытегущыIэзэ КъумпIыл Мурат къызэрэхи­гъэщыгъэмкIэ, ащ фэдэ тхьамыкIагъо нахьыбэрэ къагъэхъу­жьы хъущтэп.

«Мы лъэныкъомкIэ цIыфхэм адэгущыIэнхэм мэхьанэшхо иI. ЗекIоным республикэм зы­щеу­шъомбгъу, зызыгъэпсэфынэу Адыгеим къакIохэрэм япчъагъэ хэхъо. ЦIыфхэм загъэпсэфы зыхъукIэ щынагъоу къа­шъхьа­рыхьан ылъэкIыщтыр ашIэн фае. Мы лъэныкъом лъэшэу шъунаIэ тежъугъэтынэу сышъолъэIу», — къыIуагъ КъумпIыл Мурат.

Псыхъохэр нэпкъхэм къа­дэ­кIынхэ залъэкIыщт лъэхъаным зыфэгъэхьазырыгъэн зэрэ­фаеми республикэм и ЛIышъхьэ шъхьа­фэу анаIэ тыраригъэ-дзагъ. Псыхъохэм якъуладжэхэр игъом гъэкъэбзэнхэ, дамбэхэр гъэпытэгъэнхэ, МЧС-мрэ прогнозхэр къэзышIырэ къу­лыкъухэмрэ язэдэлэжьэныгъэ гъэ­лъэшыгъэн зэрэфаер КъумпIыл Мурат къыхигъэщыгъ.

Республикэм ипащэхэр Урысыем и МЧС Адыгэ Респуб­ликэмкIэ и ГъэIорышIа-пIэ Iут-хэм ясоциальнэ Iофыгъохэм язэшIохынкIэ IэпыIэгъу къаратыным зэрэфэхьазырхэр рес­публикэм и ЛIышъхьэ къыIуагъ. Кощхьэблэ районымкIэ селоу Вольнэм мэшIогъэкIосэ-къэ­гъэнэжьэкIо подразделениякIэ къыщызэIуахынэу унашъо аштэгъах. МэшIогъэкIосэ къулыкъум иIофышIэхэм ялэжьапкIэ ин­дексацие зэрашIыщт мылъкур мыгъэкIэ къагъотыгъ.

ЦIыфхэр ошIэ-дэмышIэ тхьамыкIагъохэм ащыухъумэгъэнхэмкIэ Iофтхьабзэу зэрахьа­гъэхэм, чIыпIэ подсистемэм Iофэу ышIагъэм афэгъэхьыгъэ докладхэр Урысыем и МЧС Адыгэ РеспубликэмкIэ и ГъэIорышIэпIэ шъхьаIэ ипащэу Станислав Илющенкэмрэ граждан зыухъумэжьынымкIэ, ошIэ-дэмышIэ IофхэмкIэ Адыгэ Рес­публикэм и Комитет итхьаматэу Вячеслав Лотаковымрэ зэ­хэсыгъом къыщашIыгъэх.

КъумпIыл Мурат Iофтхьабзэм икIэух муниципальнэ образованиехэм япащэхэм пшъэ­рылъ афишIыгъ псэупIэхэм ягъо­гухэм осыр псынкIэу зэ­ратыраукъэбзыкIыщт муниципальнэ техникэр игъом агъэхьазырынэу. Авариехэр къэхъун зэрилъэкIыщтыр къязыгъэшIэрэ электрон таблохэмрэ тамыгъэ­хэмрэ къызыфэзгъэфедэрэ шъолъырхэм яопыт къызфагъэфедэн зэрэфаер зэхэсыгъом къыщаIуагъ.

Къалэхэмрэ районхэмрэ япащэхэм пшъэрылъ афашIыгъ сабыибэ, пенсионер, сэкъатныгъэ зиIэ шъхьэзакъохэр, гъот макIэ зиIэхэр зэрыс унагъохэм машIо къазыкIанэкIэ макъэ къязыгъэIурэ пкъыгъохэр щыгъэуцугъэнхэмкIэ Iофхэр лъа­гъэкIотэнхэу.

Республикэм ипащэ зэрэхигъэунэфыкIыгъэмкIэ, респуб­ликэм ия 100-рэ илъэс тегъэ­псыхьэгъэ Iофтхьабзэхэм зызщыфагъэхьазырырэ лъэхъаным цIыфхэм щынэгъончъагъэ яIэнымкIэ Iофэу ашIэрэр агъэлъэ­шын фае.

Адыгэ Республикэм и ЛIышъхьэ ипресс-къулыкъу