ЧIыопсыр амыукъоу

Фыщт – Ошъутен къушъхьэ зэхэтыр Лэгъонэкъэ шъолъырым къыхаушъхьафыкIын унашъо зэрэщыIэр УФ-м и Правительствэ исайт къыщыхиутыгъ.

Ар IэубытыпIэ фэхъу къушъхьалъэхэм псэуалъэхэр, курортхэр, къечъэхыпIэ инхэр, нэмыкIхэр зэращамыгъэшIыщтхэм. Унашъоу ашIыгъэм ыпкъ къикIыкIэ зыфэдэ къэмыхъугъэ чIыопс комплексыр къаухъумэн алъэкIыщт. Тэ тичIыгухэм къащыкIырэ ыкIи ахэс псэушъхьэхэм афэдэхэр Урысыем ичIыпIэ пстэуми ащыплъэгъущтэп. Тхылъ Плъыжьым зыцIэ дэхьагъэу тиIэр бэдэд.

Адыгэ Республикэм и ЛIышъхьэ ипресс-къулыкъу къытыгъагъ экокурортэу «Лэгъонакъэ» фэгъэхьыгъэ проект иныр зыщашIыщт чIыналъэр «ЮНЕСКО-м» къыгъэгъунэрэ гъунапкъэхэм зэращымыщыщтыр. КъызэраIорэмкIэ, зыгъэпсэфыпIэу «Лэгъонакъэ» зыщагъэпсыщтыр гектар 1500-рэ мэхъу.

Президентэу Владимир Путиным Федеральнэ ЗэIукIэм фигъэхьыгъэ Джэ­псалъэм щыхигъэунэфыкIыгъ Урысыем ишъолъыр пстэумэ зекIоныр ащызэхэщэгъэным мэхьанэшхо зэриIэр, ау ащ дакIоу чIыопсым ибайныгъэ уукъоныр зэрэмытэрэзыр. Къушъхьэ экокурортэу «Лэгъонакъэ» агъэпсы зыхъукIэ чIыопс къабзэм зэрар зэрэрамыгъэкIыщтым лъыплъэщтых.