Мыекъуапэ илъэсыбэрэ иархитектор шъхьэIагъэу Игорь Чудесовыр дунаим ехыжьыгъ. ЩымыIэжьым иунагъо, игупсэхэм афэтхьаусыхагъ къалэм имэрэу Геннадий Митрофановыр.
— ИIофшIэн хэшIыкIышхо фыриIагъ, сэнэхьатэу къыхихыгъэми къалэми афэшъыпкъагъ. Мыекъуапэ изэтегъэпсыхьан, лъэхъаным диштэу гъэкIэрэкIэгъэным, ипсэолъэшIын, иархитектурэ иIахьышхо ахилъхьагъ. Иунагъо, игупсэхэм, зэкIэ Игорь Алексей ыкъор зышIэщтыгъэхэм тафэтхьаусыхэ, якъин адэтэгощы, — къыIуагъ къэлэ администрацием ипащэ.
Игорь Чудесовыр Мыекъопэ къэлэ администрацием архитектурэмрэ къэлэгъэпсынымрэкIэ и ГъэIорышIапIэ илъэсыбэрэ ипэщагъ. Къалэм ирайоныкIэхэм, псэупIэхэм яшIын ащ иIахьышхо ахэлъ, ащ ипроектхэмкIэ общественнэ чIыпIэ зэфэшъхьафыбэ зэтырагъэпсыхьагъ, къатыбэу зэтет унэхэр, спортым, псауныгъэм икъэухъумэн япхыгъэ псэуалъэхэр ашIыгъэх.