Ар УФ-м и Президентэу Владимир Путиным иунашъохэм ащыщ.
СтрахованиемкIэ пенсиехэм проценти 5,9-рэ къахэхъуагъэу илъэсыкIэу къихьагъэм ищылэ мазэ и 1-м къыщегъэжьагъэу къаты. Илъэс къэс ащ тетэу пенсиехэм къахэгъэхъогъэным кIэщакIо фэхъугъэри Владимир Путиныр ары.
Урысые политическэ партиеу «Единая Россия» зыфиIорэм изэхэсыгъоу илъэсэу икIыгъэм игъэмафэ зэхащэгъагъэми, пресс-конференциеу къэралыгъом ипащэ тыгъэгъэзэ мазэм къытыгъэми ар къащиIогъагъ.
Джыри илъэсыкIэу къихьагъэм мыщ къыфигъэзэжьызэ, инфляциер проценти 8,4-кIэ зэрэдэкIоягъэм фэшI проценти 8,6-м индексациер нагъэсынэу унашъо къышIыгъ. Аущтэу къызыхагъахъокIэ инфляциеу проценти 8,4-кIэ дэкIоягъэм нахьи нахьыбэкIэ пенсиехэр къаIэтыгъэхэу мэхъу.
— Пенсиехэр илъэсым икъихьагъум индексацие тшIыгъэх шъхьаем, инфляциер зэрэдэкIоягъэм къыхэкIэу цIыфхэм нахьыбэу агъэкIодын фаеу мэхъу, ахъщэ тынхэм къахэхъуагъэм ишIогъэшхо къэкIожьырэп. Джыри тапэкIэ инфляцием къыгъэлъэгъощтыр къэшIэгъуай. Ар къыдэтлъытэзэ, непэ ащ проценти 8,4-рэ хэхъуагъэмэ, пенсиехэр проценти 8,6-кIэ индексацие тшIын фае, — къыIуагъ Владимир Путиным.
Президентым пшъэрылъэу къафишIыгъэр агъэцакIэзэ, охътэ кIэкIым ищыкIэгъэ Iофтхьабзэхэр Правительствэм зэшIуихыгъэх. Джы мары проценти 5,9-рэ къахэхъуагъэу щылэ мазэм и 1-м къыщегъэжьагъэу къатырэ пенсиехэм джыри проценти 2,7-кIэ къаIэтыгъэу къатынэу рагъэжьэщт. ЗэрэхъурэмкIэ, мэзитIум пенсиехэм къахахъорэр зэхэубытагъэу проценти 8,6-рэ.