Адыгэ Республикэм футболымкIэ икIымэфэ зэIухыгъэ зэнэкъокъу хэлэжьэрэ командэхэу я 2 — 3-рэ купхэм ахэтхэм пэшIорыгъэшъ ешIэгъухэр шIэхэу аухыщтых.
Ветеранхэр
Спортым иветеранхэм якуп хэтхэм яешIэгъухэм шъуащытэгъэгъуазэ.
ВНГ — «Фыщт» — 5:0, «Молзавод» — «Картонтара-Джокер» — 4:1, «Звезда» — «Умалат» — 4:1.
Апэрэ къекIокIыгъом ыуж «Звездар» ыкIи ВНГ-р апэ итых, очко 11 зырыз яI. «Молзаводыр» я 3-рэ чIыпIэм щыI, очкоуи 10 ригъэкъугъ.
ЯтIонэрэ купэу «А»-р
«Спартак» — «Тульскэр» — 2:5, «Сокол» — «Сириус» — 3:4, «Ошъутен-2» — «Роверс» —
3:0, «МыотIыхэр» — «Динамо» — 0:13.
Купэу «Б-р»
«Спортмастер-3» — «Делотехника» — 3:4, «Космос» — «Самбырныгъ» — 2:2, «Арсенал» — «Спортмастер-2» — 4:2.
— Апэрэ чIыпIи 4-р купхэм къащыдэзыхырэ командэхэр кIэух ешIэгъухэм шъхьафэу ахэлэжьэщтых, — къытиIуагъ Адыгэ Республикэм футболымкIэ изэнэкъокъу исудья шъхьаIэ игуадзэу Пэнэшъу Мыхьамодэ. — ЗэIукIэгъухэр гъэшIэгъонэу макIох, хагъэунэфыкIырэ чIыпIэхэм афэбанэ зышIоигъохэр бэ мэхъух. Ащ фэшI зэнэкъокъур нахь гъэшIэгъонэу лъэкIуатэ.
— КIымэфэ ешIэгъухэм тигуапэу тахэлажьэ, — къеIуатэ Адыгеим ифутбол щызэлъашIэу, «Самбырныгъэм» ипащэу Пэунэжь Азэмат. – Футбол тешIэзэ рэхьатныгъэ тхэлъыным, щыIэныгъэм шэн-хэбзэшIухэр щызетхьанхэм тыпылъ. Спортым нахь тызэфищэу сэлъытэ.
Зэнэкъокъум исудья шъхьаIэу Сергей Двойниковым, ащ игуадзэу Пэнэшъу Мыхьамодэ язэфэхьысыжьхэм къащыхагъэщыгъ стадион зэтегъэпсыхьагъэм зэIукIэгъухэр зэрэщыкIохэрэр. ЗэхэщакIохэм яшIуагъэкIэ нэрылъэгъу IэпыIэгъухэр узыIэпащэу гъэпсыгъэх.
Командэхэм язэнэкъокъу зэрэкIорэр таблом къегъэлъагъо, чIыпIэу аIыгъхэр, зичэзыу ешIэгъухэр зыщыIэщтхэ мафэхэр.
Осыр къызесым, ешIапIэр аукъэбзи, псынкIэу зэIукIэгъум зэрэфагъэхьазырыгъэр зэхэщакIохэм яшIушIагъ.
Апшъэрэ, ятIонэрэ ящэнэрэ купхэм ахэт командэхэр шэмбэтым, тхьэумафэм стадионэу «Юностым» щызэдешIэх. Псауныгъэр зыгъэпытэ, языгъэпсэфыгъо уахътэ гъэшIэгъонэу зыгъакIо зышIоигъохэр стадионым къэкIох, ешIэгъухэм яплъых. Командэ 29-рэ зэнэкъокъум хэлажьэ.