Шапхъэхэр амыукъонхэм лъыплъэщтых

2021-рэ илъэсэу икIыгъэм Адыгэ Республикэм гъогу хъугъэ-шIэгъэ 428-рэ щагъэунэфыгъ, ахэм нэбгырэ 91-рэ ахэкIодагъ, 495-мэ шъобжхэр атещагъэхэ хъугъэ.

ЛъэсрыкIохэр зыхэфэрэ хъу­гъэ-шIагъэхэм уамыгъэгумэкIын плъэкIырэп. Ахэр гъогум щытыраутыгъэхэу хъугъэ-шIэгъи 106-рэ агъэунэфыгъ. Ахэм нэбгырэ 24-рэ ахэкIодагъ, 83-мэ шъобж­хэр атещагъэхэ хъугъэ. Хъугъэ- шIэгъэ 56-р гъогу зэпырыкIыпIэхэм къащыхъугъ.

Урысыем и МВД гъогурыкIоныр щынэгъончъэнымкIэ и Къэралыгъо автоинспекцие и ГъэIорышIапIэ иунашъоу «О дополнительных мерах по профилактике детского дорожно- транспортного травматизма» зыфиIорэм къыдыхэлъытагъэу, гъогурыкIоныр щынэгъончъэу щытыным, гъогухэм къатехъу­хьэрэ хъугъэ-шIагъэхэр нахь макIэ шIыгъэнхэм, водительхэмрэ лъэсрыкIохэмрэ Iэдэб ахэлъэу гъогум щызекIонхэм, кIэлэцIыкIухэм шъобжхэр атещагъэ мыхъунхэм ыкIи зы­ныбжь имыкъугъэхэр щынэгъон­чъэу къыращэкIынхэм апае щылэ мазэм и 17-м къыщегъэжьа­гъэу и 23-м нэс пэшIорыгъэшъ Iоф­тхьабзэхэу «ЛъэсрыкIу», «Лъэс­рыкIо зэпырыкIыпI» зыфи­Iохэрэр Адыгэ Республикэм щыкIощт.

Iофтхьабзэр окIофэ гъогу-патруль къулыкъум иIофышIэхэр лъэсрыкIохэр нахьыбэу зыщызекIорэ чIыпIэхэм къулыкъур ащахьыщт, гъогурыкIоным ишапхъэхэр зыукъорэ водительхэм, анахьэу лъэсрыкIохэм алъыплъэ­щтых.

Джащ фэдэу гъогурыкIоным ишапхъэхэр амыукъонхэмкIэ, гъогум шъхьэкIафэ ыкIи сакъы­ныгъэ къыщызхагъэфэнымкIэ къулыкъушIэхэм лъэсрыкIохэмрэ водительхэмрэ къагъэуцухэзэ зэдэгущыIэгъухэр адашIыщтых.

Мы IофтхьабзэмкIэ зэхэщакIохэм мурадэу яIэр лъэсрыкIохэмрэ водительхэмрэ гъогурыкIоным ишапхъэхэр амыукъон­хэмкIэ пэшIорыгъэшъ Iофтхьабзэхэр адызехьэгъэнхэр ары. Автомобиль гъогубгъум тетэу зекIорэ лъэсрыкIохэм пшъэдэ­кIыжь арагъэхьыщт.

ГъогурыкIоным ишапхъэхэр шъумыукъонхэу автоинспекцием икъулыкъушIэхэр къышъуа­джэх. ШъуищыIэныгъэ нахь лъапIэ зэрэщымыIэр зыщышъу­мыгъэгъупш.

Полицием имайорэу
Т.К. ЛIыунай