«Къеблагъ, почтальоныр, къеблагъ!»

Мы гущыIэхэр бэрэ къэтIонхэкIэ сыгугъэрэп. Тхьамафэм зэ гъэзетхэр къахьых, телепро­граммэр игъусэу, ари къамыхьыжьэу хъункIи мэхъу.

Хьарунэ къыфеIуатэ иныб­джэгъу кIалэу ыдэжь къэкIуагъэм: «Адэ, Хьарун, гъэзет къизытхы­кIэу чылэм дэсыр мэкIэ дэд, лэжьапкIэу почтальонхэм аратырэр макIэ, гъэзетхэр лъапIэх уакIэтхэнкIэ, джары Iофыр зы­мыгъакIорэр». «Ары, ары», — ыIуагъ Хьарунэ.

БлэкIыгъэ лъэхъаным гъэзетхэр бэдэдэу къыратхыкIыщтыгъэх. Зы унагъом щы, плIы, тфы, ахэм ягъусагъэх журналхэу «Зэкъошныгъэр», «Жъогъо­быныр», «Крестьянкэр», нэмыкI­хэри.

КъизымытхыкIэу къуаджэм дэсыгъэр мэкIэ дэдагъ. А лъэ­хъаным почтальонэу тиIагъэр Хъалыщмэ янысэу Загрэт. «Загрэт цIыкIур» аIоти, гъэшIуабзэу цIыфхэр еджэщтыгъэх. Лъытэны­гъэшхо зыфашIырэ бзылъфыгъ. Ащ фэдиз гъэзетыр, журналыр онтэгъунба, ащ нэмыкIэу пенсионермэ пенсиер афихьы­щтыгъ, коммунальнэ фэIо-фашIэхэм ауаси афитыщтыгъ, зыхьын зы­мылъэкIыщт ныо-лIыжъхэм ахэр афыдигъэцакIэу щытыгъ, конверт, открытк «уищыкIэгъэщтмэ» ыIоти, ахэри диIыгъхэу ыщэщтыгъэх. Джащ фэдизыр а бзылъфыгъэ цIыкIум фызэшIо­кIыщтыгъ. Илъэс 27-рэ почтэм Iоф щишIагъ.

Почтэр поселкэу Отраднэм дэтыгъ, ар километрищкIэ тпэ­чыжьагъ. Джащ къырихыти, чы­лэм къыхьыти, игъом хэти игъэзети ижурнали нигъэсыжьыщтыгъ. ЦIыфхэр лъэш дэдэу фэрэзагъэх, ипащэхэри къызэ­рэфэразэхэр тшIэщтыгъ. Хэкур краим ащыгъум хахьэщтыгъ. Краим ахэм шIухьафтын дэ­гъухэр къафишIыщтыгъ, щытхъу тхылъхэр къыфагъэшъошагъэу бэу иIэх. Загрэт еджагъ, сэнэ­хьат иI, ар Тэхъутэмыкъуае нэс кIозэ район сымэджэщым бухгалтер шъхьаIэу Iоф щишIэ­щтыгъ, ау машинэ пIэ имылъэу укIон-укъэкIожьыныр зэрэхьы­лъэм къыхэкIэу почтэм зыкъигъэзэжьыгъагъ.

Загрэт адыгэгъэ, цIыфыгъэ шэн-хэбзэ дахэ хэлъ. Гъогум цIыф къырэкIомэ, ыпэ зэпичыщтэп, лIыжъы е ныо IукIагъэмэ, гущыIэ дахэ хэти къыфигъотыщтыгъ. Джащ фэд, ягъунэгъу бзылъфыгъэр къызэсымаджэм, янэ къылъфыгъэм фэдэу ар ыIыгъыжьыгъ. Гъунэгъухэри лъы­плъэщтыгъэх а бзылъфы­гъэм, ау анахь пылъыгъэр Заг­рэт арыгъэ. Бзылъфыгъэр щэ­Iэфэ зыми щигъэкIагъэп. Хъяр е къин чылэм дэтэу хъумэ, Заг­рэт пчэдыжьым жьэу кIощтыгъ, быным дэIэпыIэщтыгъ. Ащ ыужым почтэм кIоти, посел­кэу Отраднэм а зэкIэ къыхьыщтыгъэ. ИIофшIэн ыгъэцакIэщтыгъ. Зы мафэ химынэу мы бзылъфыгъэм игъом почтэр къыхьыщтыгъ.

Уайи, оси, щтыргъукIи къагъа­нэщтыгъэп. Джы асфальт зэрэтиIэм фэдэу а лъэхъаным щы­тыгъэп, псынжъыгъэ, къиныгъэ укIоныр, етIани онтэгъушхор ыIыгъэу а зэкIэри къыкIухьэщтыгъ.

Мы бзылъфыгъэм гъунэгъу­хэм, Iахьылхэм, гупсэхэм е зи­мыIэ шIошIыхэрэм сыдигъуи ылэжьыгъэм щыщ афехьы, «чылапхъэ шъушIын» ыIозэ. Загрэт ыгу зэIухыгъ, цIыфмэ шIу афи­шIэ шIоигъу, ар ишэн-хабз. Ары адыгэхэр сыдигъуи зэрэщытыгъэхэр.

Загрэт унагъо иI. Мыхьамо­дэрэ Загрэтрэ пшъэшъитIу зэ­дапIугъ: Светэ кIэлэегъадж, унэ­гъо дахэ ихьагъ, Римми ащ фэд, унагъо ис. Зэшъхьэгъусэхэм пхъорэлъфищ яI, ахэм лъэш дэдэу ащэгушIукIых. Ежь Iоф­шIэнэу иIэм нэмыкIэу чылэм дэсхэм Мыхьамодэ къэхалъэм лъыплъэнэу хадзыгъ. ЗэрэIухьагъэм тетэу Iофым фежьагъ, хьа­дэ фэIо-фашIэхэр зыщагъэцэкIэрэ унэр къоджэ админист­рацием ипащэу Хьахъурэтэ Адамрэ ежьыррэ аIэ зэкIэдзагъэу агъэцэкIэжьыгъ. Унэ цIыкIум ыIупэ IуигъэчъыкIыгъ, шIы­хьаф­кIэ чъыгыжъэу дэтхэр рахыкIыгъэх. Къэхалъэм уцэу дэтыр игъом аригъэупкIэщтыгъ. Мыхьамодэ цIыфхэр щыгугъхэу зыфагъэзэгъэ Iофыр дэгъу дэдэу зэрэзэшIуихырэм пае къоджэ администрацием Щытхъу тхылъ къыфигъэшъошагъ. ЛIым ипсау­ныгъэ тIэкIу къызызэщэкъом, IукIыжьын фаеу хъугъэ, ау цIыф­хэр лъэшэу кIэлъэIугъэх къыгъэзэжьынэу, а Iофэу ригъэ­жьагъэр лъигъэкIотэнэу. Джарэу хъупхъэх зэшъхьэгъусэхэр.

Сэ насыпыгъэу сэлъытэ ащ фэдэ цIыфхэр чылэм зэрэ­дэсхэр.

Джы Загрэт пенсием щыI. Гумызэгъэ хъупхъэу, шIушIэныр зикIэсэ Хъалыщ Загрэт Юныс ыпхъум къызыхъугъэ мафэр бэмышIэу хигъэунэфыкIыгъ, фэ­кIуагъэри, фэгушIуагъэри бэ. Псауныгъэ пытэ иIэу, иунагъо, илъфыгъэхэм, икъуаджэ бэрэ ашъхьэщытынэу тыфэлъаIо.

Хьахъурэтэ Свет.

Натыхъуай.