Адыгеим и Къэралыгъо филармоние илъэс 50 хъугъэ.
Краснодар краим ифилармоние икъутамэу Адыгэ хэкум иконцертнэ-эстраднэ бюро 1962-рэ илъэсым, шэкIогъу мазэм зэхащагъ. ЛэжьакIохэм къафатырэ концертхэр нахьышIоу гъэпсыгъэнхэм, искусствэм имэхьанэ къэIэтыгъэным фэшI Адыгэ концертнэ-эстраднэ бюрор 1972-рэ илъэсым ашIыгъ. Унэе IофшIапIэу хэкум иIэхэм филармониер къазэрэхэхъуагъэм шIуагъэу къытырэр щыIэныгъэм къыщылъэгъуагъ.
Апэрэхэм ащыщых
Адыгеим и Къэралыгъо къэшъокIо ансамблэ, эстраднэ ансамблэу «Оридам», ансамблэу «Адыгеир сиорэд» зыфиIорэм, Сэмэгу Гощнагъо зыхэт орэдыIо купым, нэмыкIхэм филармонием Iоф щашIэу рагъэжьагъ.
Илъэсхэр кIуагъэх. Къэралыгъо филармониер пытэу ылъэ теуцуагъ. Мыекъуапэ къэзыгъэдэхэрэ унэшхо зэтегъэпсыхьагъэм ащ ипчъэхэр къыщызэIуахыгъэх. Адыгэ Республикэм итын анахь лъапIэу медалэу «Адыгеим и Щытхъузехьэр» филармонием къыфагъэшъошагъ.
Республикэм ихэхъоныгъэхэр
Краснодар краим Адыгеир къыхэкIыжьи республикэ зэхъум, тикультурнэ ыкIи музыкальнэ искусствэ хэпшIыкIэу заушъомбгъугъ. Европэ культурэм илъэгапIэхэм алъыIэсыгъэхэ коллективи 5-мэ филармонием Iоф щашIэ.
Адыгэ Республикэм и Къэралыгъо филармоние и Къэралыгъо симфоническэ оркестрэ, урыс лъэпкъ музыкальнэ Iэмэ-псымэхэмкIэ оркестрэу «Русская удалыр», нысхъапэхэм ятеатрэу «Дышъэ къошыныр», эстрадэ ансамблэу «Ошъутенэр», Камернэ музыкальнэ зэхэхьапIэр филармонием щэлажьэх.
Урысыем и Правительствэ и Къэралыгъо премие къыфагъэшъошагъ Адыгэ Республикэм и Къэралыгъо орэдыIо-къэшъокIо ансамблэу «Ислъамыем». Дунаим щызэлъашIэрэ «Ислъамыем», нэмыкIхэм филармониер IофшIапIэ афэхъугъ.
Пшъэрылъ шъхьаIэхэр
— Культурэм, искусствэм ябаиныгъэхэр къэухъумэгъэнхэр, уахътэм диштэу лъыгъэкIотэгъэнхэр типшъэрылъ шъхьаIэхэм ахэтэлъытэх, — къытиIуагъ АР-м и Къэралы- гъо филармоние ипащэу, Урысыем изаслуженнэ артистэу, Адыгэ Республикэм, Темыр Осетием — Аланием янароднэ артистэу, Пшызэ искусствэхэмкIэ изаслуженнэ IофышIэшхоу Къулэ Мыхьамэт. — Академическэ музыкальнэ искусствэм хэхъоныгъэу ышIырэр цIыфхэм алъыгъэIэсыгъэным тыпылъ.
— Музыкэм лъэпкъхэр зэфещэх, къэралыгъохэм язэпхыныгъэхэр егъэпытэх.
— ЦIыфхэм нахь агу рихьырэ музыкэр зэхахыным мэхьэнэ ин етэты. Культурэм, искусствэм лъэпкъхэр агъэгъуазэх. Урысыем, Адыгеим язаслуженнэ артистхэр, ясэнэхьат хэшIыкI ин фызиIэхэр тиIэх. Шэн-хабзэхэр къэтыухъумэхэзэ, лъэхъаным диштэрэ шIыкIэшIухэр къэтэгъотых.
— Щысэ къэпхьыгъэмэ дэгъугъэ.
— Мыекъуапэ щыкIорэ концертхэм, спектаклэхэм лъэпкъ зэфэшъхьафхэр яплъых, яшIэныгъэ хагъахъо. Ащ дакIоу, тиоркестрэхэм, ансамблэхэм Къыблэ шъолъырым, Темыр Кавказым, Москва, IэкIыб хэгъэгухэм концертхэр, зэхахьэхэр ащызэхащэх. Искусствэм лъэпкъ ыкIи къэралыгъо зэпхыныгъэхэм ялъэмыджхэр егъэпытэх.
— Мыхьамэт, Урысыем, IэкIыб хэгъэгухэм яартист цIэрыIохэм, ансамблэхэм яконцертхэр филармонием зэрэщыкIохэрэм сыда къепIуалIэ пшIоигъор?
— Ащ фэдэ концертхэр зэхэпщэнхэм уфэхьазырын фае. Филармониер культурэ щыIакIэм игупчэ хъугъэ. Искусствэм цIыфыр епIу, щыIэныгъэм фегъасэ. Дунаим щызэлъашIэрэ артистхэр филармонием зэрэщытлъэгъухэрэм тырэгушхо. ГукIи, псэкIи искусствэм идэхагъэ зезыхьэхэрэ артистхэм зэфыщытыкIэу адытиIэр мэпытэ.
— Симфоническэ оркестрэм игъусэхэу артист цIэрыIохэм Мыекъуапэ концертхэр къыщатых. Ащ фэдэ шIыкIэр лъыжъугъэкIотэщта?
— Тигуапэу лъыдгъэкIотэщт. Москва къикIыгъэ артист цIэрыIоу Владислав Косаревым КъумпIыл Къадырбэчрэ Анзорыкъо Чеславрэ зэдаусыгъэ орэдэу Адыгеим фэгъэхьыгъэр къыIуагъ. Оркестрэр игъусэу орэдыр къызыхедзэм, залым чIэсхэр дежъыугъэх.
— Фестивальхэр, зэнэкъокъухэр филармонием зэрэщыкIохэрэм тыщыгъуаз.
— Хэгъэгум ишъолъырхэм къарыкIыхэу республикэр нахьышIоу зэзыгъашIэ, тичIыопс идэхагъэ зэзыгъэлъэгъу зышIоигъохэр, зекIо къакIохэрэр нахьыбэ хъунхэм тыпылъ. Iофым егъэжьэпIэшIоу фэтшIыгъэхэр лъыдгъэкIотэщтых.
— Адыгэ Республикэм и Правительствэ изэIукIэ хэхыгъэ шъхьаIэхэр, мэфэкI Iофтхьабзэхэр филармониер ары зыщызэхащэхэрэр.
— Филармониер щыIэныгъэм ихъугъэ-шIагъэхэм ягупчэ ит, цIыфхэр зэфещэх. Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэр бжыхьэм игъэкIотыгъэу республикэм щагъэмэфэкIыщт.
— Филармониер ащ чанэу хэлэжьэщтба?
— Адыгэ Республикэм и ЛIышъхьэу КъумпIыл Мурат, Правительствэм яшIуагъэкIэ гъэцэкIэжьын, зэхэщэн Iофхэр дэгъоу лъытэгъэкIуатэх. Республикэм икъэралыгъо гъэпсыкIэ игъэпытэн филармонием иIахьышIу хилъхьащт.
— Шъуигъэхъагъэхэм ахэжъугъэхъонэу шъуфэсэIо.
— Тхьауегъэпсэу.
ЕмтIылъ Нурбый.