Джыри зэ индексацие шIыгъэнхэу

УФ-м и Президентэу Владимир Путиным министрэхэм я Кабинет зэхэсыгъоу дишIыгъэм ащ фэдэ предложение къыщихьыгъ.

СтрахованиемкIэ пенсиехэм проценти 5,9-рэ къахэхъуагъэу илъэсыкIэу къихьагъэм ищылэ мазэ и 1-м къыщегъэжьагъэу къаты. Илъэс къэс ащ тетэу пенсиехэм къахэгъэхъогъэным кIэщакIо фэхъугъэри Владимир Путиныр ары. Джыри инфляциер проценти 8,4-кIэ зэрэдэкIоягъэр къыдилъытэзэ, проценти 8,6-кIэ къэIэтыгъэнхэу унашъо къышIыгъ.

Инфляциер зэрэдэкIоягъэм къыхэкIэу цIыфхэм нахьыбэу агъэкIодын фаеу зэрэхъугъэр, ащ фэшI нахьыпэкIэ пенсиехэм къахэхъуагъэм ишIогъэшхо къы­зэрэмыкIожьыщтыр Владимир Путиным къыхигъэщыгъ.

— Джыри тапэкIэ инфляцием къыгъэлъэгъощтыр къэшIэгъуай. Ар къыдэтлъытэзэ, непэ ащ проценти 8,4-рэ хэхъуагъэмэ, пенсиехэр проценти 8,6-кIэ индексацие тшIын фае. Ащ ищыкIэгъэ пстэур Правительствэм охътэ кIэкIым къыгъэхьазырынэу сыкъежэ, — къыIуагъ Президентым.