Вакцинэр шIэхэу агъэфедэнэу рагъэжьэщт

ЭпидемиологиемкIэ ыкIи микробиологиемкIэ научнэ ушэтын Гупчэу Гамалеи ыцIэ зыхьырэм ипащэу Александр Гинцбург къызэриIуагъэмкIэ, коронавирусым пэуцужьырэ вакцинэу «Спутник М» зыфиIоу кIэлэцIыкIу Iэтахъохэм апае къыдагъэкIыгъэр къэкIощт тхьамафэм къыщегъэжьагъэу агъэфедэнэу рагъэжьэщт.

— Псауныгъэр къэухъумэгъэнымкIэ Министерствэри, тэри, нэмыкI структурэ заулэхэри вакцинэм пхъашэу лъэплъэх. ТызэрэщыгугъырэмкIэ, къэкIощт тхьамафэм ар граждан гъэзекIоным къыхэ­хьащт, — хигъэунэфыкIыгъ академикым.

Шъугу къэдгъэкIыжьын, Iэтахъохэу илъэс 12 – 17 зыныбжьхэм апае агъэхьазырыгъэ урысые вакцинэу «Гам-КОВИД-Вак М» («Спутник М») зыфиIорэр 2021-рэ илъэсым шэкIогъум и 24-м УФ-м псауныгъэр къэухъумэгъэнымкIэ и Министерствэ щатхыгъ.

Джащ фэдэу, шъугу къэдгъэ­кIыжьын, Адыгеим иэпидемиологхэм къызэраIорэмкIэ, щылэ мазэм ыкIэхэм – мэзаем икъи­хьагъу коронавирусым иштаммыкIэу «омикроным» зыкъиштэным ищынагъо зэрэщыIэр.

Ащ епхыгъэу Iэзэгъу уцхэу, зызэраухъумэрэ пкъыгъохэу, медицинэ оборудованиеу, зыщяIэзэщтхэ чIыпIэхэу ящыкIагъэм фэдиз IэпэчIэгъанэ яIэнэу Адыгеим и ЛIышъхьэу КъумпIыл Мурат ащ фэгъэзэгъэ къулыкъу­хэм пшъэрылъ афишIыгъ.