Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэр УФ-м и Президентэу Владимир Путиныр кIэщакIо зыфэхъугъэхэм ащыщ. Ащ къыдыхэлъытагъэу зэшIуахыщт Iофтхьабзэхэм апае 2021-рэ илъэсэу икIыгъэм сомэ миллиард 555,6-рэ къэралыгъом ибюджет щагъэнэфэгъагъ. АщкIэ гъогум епхыгъэ псэолъэ мини 5,7-рэ кIэу ашIыгъ е агъэцэкIэжьыгъ.
Мы лъэпкъ проектым къыдыхэлъытагъэу Адыгеим иавтомобиль гъогу Iахь 52-рэ гъэрекIо агъэцэкIэжьыгъ, ар километрэ 75,6-м ехъу. Анахь кIыхьэр Красногвардейскэ районым игупчэу селоу Красногвардейскэм икIэу къуаджэу Адэмые, къутырэу Чумаковыр зэпызычыхэрэр ары. Километри 6,4-рэ зэкIэмкIи мэхъу, сомэ миллион 96,8-рэ тефагъ.
Мыекъуапэ пштэмэ, лъэпкъ проектым къыдыхэлъытагъэу гъогу Iахь 18 щагъэкIэжьыгъ. Километрэ 12,3-рэ ар зэкIэмкIи мэхъу, сомэ миллиони 193-м ехъу ахэм апэIухьагъ.
Джащ фэдэу лъэпкъ проектым ишIуагъэкIэ къалэм иурамхэу Лениным ыцIэ зыхьырэмрэ Комсомольскэмрэ зыщызэблэкIыхэрэм нэфрыгъуазэ щагъэуцугъ, урамхэу Пушкиным ыкIи Гоголым ацIэ зыхьыхэрэм язэхэкIыпIэ щытыр зэблахъугъ. Водительхэм скоростэу зэрэкIохэрэм хагъэкIыным пае урамхэу Шэуджэным ыцIэ зыхьырэмрэ Кирпичнэмрэ, Курганнэмрэ Свободэмрэ, Адыгейскэмрэ Некрасовым ыцIэ зыхьырэмрэ язэхэкIыпIэхэм, урамхэу Шоссейнэм, Лесноим, Депутатскэм гъогум къытеIэтыкIыгъэхэр ащыфашIыгъэх.