КъэучъыIыщт

КIымафэм иятIонэрэ мазэ тыхэт нахь мышIэми, ом изытет фэбагъэ, гъатхэм фэдэу тыгъэр къепсыгъ. Ау щылэ мазэм и 12-м къыщегъэжьагъэу къэучъыIынэу ригъэжьагъ.

Ощх-ос цIынэ зэхэтыкIэ мафэр кIуагъэ, синоптикхэм къызэратырэмкIэ, ос къесынэу ригъэжьэщт. ТхьамэфитIум къакIоцI мафэм чъыIэр градуси 4-м шIомыкIыщтми, чэщрэ чъыIэщт, градуси 10 — 11-м нэсыщт. Жьыбгъэшхом зыкъыIэтэуи мафэхэр къыхэкIыщтых.

КIымэфэ лъэхъаным изыфэгъэхьазырын Адыгэ Республикэм сыдигъокIи анаIэ щытет. Мыекъуапэ имэрэу Геннадий Митрофановым ошIэ-дэмышIэ Iоф къэмыхъуным къэлэ къулыкъухэр фэхьазырынхэр пшъэрылъэу афигъэуцугъ. Муниципальнэ гъэпсыкIэ зиIэ «Къалэу Мыекъуапэ» непэрэ мафэм ехъулIэу ос къызесыкIэ щагъэфедэщт хэушъхьафыкIыгъэ техникэр агъэхьазырыгъ. Гъогу­хэм атехъорэ осыр ыкIи мылыр атыратхъуным фэхьазырых, ащ фытегъэ­псыхьэгъэ техникэ 25-рэ щыт. Ахэм ахэтых осыр тезытхъурэ ыкIи пшахъор зэбгырызытэкъурэ машинэхэр, КамАЗхэр, грейдерхэр, тракторхэр. Джащ фэдэу паркхэр, скверхэр, гъогу напцэхэр зэрагъэкъэбзэрэ хэушъхьафыкIыгъэ техникэри хьазыр.

Осыр бэу гъогухэм къазытырилъхьэкIэ, нэмыкI транспорхэри къыхагъэлэжьэщт. Гъогухэр цIэнлъагъо зыхъукIэ техническэ щыгъоу тыратэкъощт тонн 500-р, пшэхъо тонн 2000-р ыкIи пшэхъо- щыгъу зэхэлъ тонн 2500-р агъэхьазырыгъ.

Ом изытет къызызэIахьэкIэ егъэзыгъэ Iоф хэмылъымэ автомобильхэм арысхэу гъогухэм къатемыхьанхэу цIыфхэм къэлэ администрациер къяджэ. Джащ фэдэу гъогур зыукъэбзырэ автомобильхэм зэрар ямыкIыным пае транспортыр гъогу напцэхэм къаIуагъэуцо зэрэмыхъу­щтыр агу къагъэкIыжьы.

ДЕЛЭКЪО Анет.