Зыфэгъэзагъэхэм къахэхъуагъ

УФ-м ПенсиехэмкIэ ифонд фэIо-фашIэу ыгъэцакIэрэр 2022-рэ илъэсым ищылэ мазэ и 1-м къыщыублагъэу нахьыбэ хъугъэ. НахьыпэкIэ УФ-м Iоф­шIэнымкIэ ыкIи цIыфхэр социальнэу къэухъумэгъэнхэмкIэ и Министерствэрэ мы лъэныкъом фэгъэзэгъэ къулыкъу­хэмрэ агъэнафэщтыгъэ ахъщэ тынхэм, компенсациехэм ыкIи пособиехэм ащыщыбэхэр джы фондым ыгъэнэфэщтых ыкIи ытыщтых.

Федеральнэ хэбзэгъэуцугъэм зэхъо­кIыныгъэу фашIыгъэхэм зэращыгъэнэфагъэмкIэ, ахъщэ тынхэм афэгъэхьы­гъэу Iоф 4287-р ПенсиехэмкIэ фондым фэгъэзэжьыгъэ хъугъэ. Ащ къыхиубытэу фондым ахъщэ тын зыфигъэпсыщтхэр:

• кIэлэцIыкIу зиIэу Iоф зымышIэхэрэр;

• радиацием иягъэ зэригъэкIы­гъэхэр;

• реабилитацием къыхиубытагъэхэр;

 

• сэкъатныгъэ зиIэу, (кIэлэцIыкIоу сэкъатныгъэ зиIэхэри ахэт­хэу) ипсауныгъэ пае автотранспорт зэзгъэгъотыгъэхэр;

• дзэм къулыкъу щызыхьы­гъэхэмрэ ахэм яунагъохэм арысхэмрэ.

ГущыIэм пае, илъэсыкIэр къызихьагъэм къыщегъэжьагъэу ПенсиехэмкIэ фондым ыгъэпсыщтхэм ащыщ сабыим ыныбжь илъэсрэ мэзихырэ охъуфэкIэ пособиеу ным къыратырэр, сабый ежэрэ бзылъфыгъэу е къызфэхъугъэу, организациеу зыIутыгъэр зэрэзэфашIыгъэм къыхэкIыкIэ IофшIапIэ имыIэу къэнагъэ­хэм апае пособиер, кIэлэцIыкIур къызэрэхъугъэм пае зэтыгъоу къатырэ компенсациер, унагъом ыпIунэу сабыир зэриштагъэм пае зэтыгъо пособиеу къыфакIорэр, дзэм дащыгъэу къулыкъу зыхьырэм ишъхьэгъусэу сабый ежэрэм пае зэтыгъо ахъщэ тынэу къыратырэр ыкIи мазэ къэс къыфэкIощт пособиер.

ПенсиехэмкIэ фондым ыгъэпсынэу фагъэзэжьыгъэ фэIо-фашIэхэм яспискэ ащ иинтернет нэкIубгъо ижъугъотэщт.

Ахъщэ тынхэм ягъэпсын пае икIэрыкIэу фондым зыфагъэзэн, лъэIу тхылъ атынэу ищыкIагъэп. НахьыпэкIэ ахъщэ IэпыIэгъухэр къызэратIупщыщтыгъэ реквизитхэмкIэ фондми ыгъэхьыщт. Ахэм ащыщ къызтефэу, ау ыпэкIэ ар зымыгъэфедагъэхэм ПенсиехэмкIэ фондым икъулыкъоу цIыфхэм Iоф адэзышIэрэм зыфагъэзэн алъэкIыщт.

Мы фэIо-фашIэхэр УФ-м ПенсиехэмкIэ ифонд зэрэфагъэзагъэхэм социальнэ IэпыIэгъум игъэпсыни, цIыфхэм ар къызэрэзыIэкIагъэхьащтыри нахь IэшIэх къышIыщтых.

Адыгеим щыпсэоу социальнэ IэпыIэгъум фэгъэхьыгъэ упчIэ зиIэр мы телефонымкIэ къытеомэ хъущт: 8 800-600-01-58 (ыпкIэ хэлъэп). ЦIыфхэм Iоф адэзышIэрэ Гупчэм изыкI телефони агъэфедэн алъэкIыщт: 8 800-600-00-00. Ащи ыпкIэ хэлъэп.

УФ-м ПенсиехэмкIэ ифонд
и Къутамэу АР-м щыIэм ипресс-къулыкъу.