Мы аужырэ илъэсхэм гъэсэныгъэм исистемэ зэхъокIыныгъэшIухэр фэхъух. Республикэм ичIыпIэ зэфэшъхьафхэм гурыт еджапIэхэр, кIэлэцIыкIу IыгъыпIэхэр кIэу зэрэщашIыхэрэм дакIоу игъэкIотыгъэ гъэцэкIэжьынхэри щэкIох. Илъэс къэс пшъэрылъ гъэнэфагъэхэр щыIэу, чэзыу-чэзыоу IофшIэнхэр зэшIуахых.
2022-рэ илъэсым агъэцэкIэжьынэу щыт лицееу N 19-м Мыекъуапэ имэрэу Геннадий Митрофановыр бэмышIэу щыIагъ.
Федеральнэ программэу «Гъэсэныгъэм хэхъоныгъэ ышIыныр» зыфиIорэм ыкIи АР-м и ЛIышъхьэ иIэпыIэгъу ишIуагъэкIэ мы илъэсым лицеим игъэкIотыгъэ гъэцэкIэжьынхэр рашIылIэщтых. Инженернэ коммуникациехэр зэблахъущтых, еджапIэм ыкIоцI ыкIи ыкIыб агъэцэкIэжьыщт, пчъэхэр ыкIи шъхьаныгъупчъэхэр зэблахъущтых, еджапIэм ичIыунэ агъэкIэжьыщт. Учреждением ищынэгъончъагъэ гъэпытэгъэным анахьэу анаIэ тырагъэтыщт.
Мыекъуапэ ипащэ еджапIэр къыкIухьагъ, спортивнэ залыр, нэмыкI кабинетхэри къыплъыхьагъэх, джащ фэдэу гъэцэкIэжьыным ипроект тегущыIагъэх.
— ГъэцэкIэжьыным иуцугъо пэпчъ, проектнэ-сметнэ тхьапэхэм къащегъэжьагъэу, экспертизэм, IофшIэнхэр зэрэкIохэрэм нэс гъунэ лъыфыгъэн фае, — къыIуагъ Геннадий Митрофановым.
Лицеир 1965-рэ илъэсыр ары зашIыгъагъэр. Непэрэ мафэм ехъулIэу ащ кIэлэеджэкIо 1000 щеджэ. 2020-рэ илъэсым лъэпкъ проектэу «Гъэсэныгъ зыфиIорэм къыдыхэлъытагъэу естественнэ-научнэ лъэныкъомкIэ шIэныгъэ зэрагъэгъотыным фытегъэпсыхьэгъэ оборудованиякIэхэр къыратыгъэх.
— Гъэсэныгъэм исистемэ хэхъоныгъэхэр ышIынхэм фэгъэхьыгъэ Iофыгъохэм АР-м и ЛIышъхьэу КъумпIыл Мурат ынаIэ атет. ЕджапIэхэм ягъэцэкIэжьын пэIухьащт ахъщэу къатIупщырэр зэрифэшъуашэу гъэзекIогъэныр, аужырэ шапхъэхэм адиштэрэ шапхъэхэмкIэ ахэр зэтегъэпсыхьэгъэнхэр пшъэрылъ шъхьаIэхэм ащыщ, — къыIуагъ Мыекъопэ къэлэ администрацием ипащэ.
Мы илъэсым федеральнэ программэм игъэцэкIэн къыдыхэлъытагъэу лицееу N 19-р, гимназиеу N 22-р ыки поселкэу Гавердовскэм дэт гурыт еджапIэу 18-р агъэкIэжьыщтых.