Вакцинэм игъусэу ишIуагъэ къэкIощт

Коронавирусым пэуцужьырэ препаратэу «КОВИД-глобулин» зыфиIорэр клиническэ ушэтынхэм апхырыкIыгъ ыкIи УФ-м псауныгъэр къэухъумэгъэнымкIэ и Министерствэ ыштагъ. Мы узымкIэ сымэджагъэхэм алъ иплазмэ ар хашIыкIыгъ.

Ростехым и «Лъэпкъ иммунобиологическэ компание» Iэзэгъу уцым игъэхьазырын Iоф дишIагъ ыкIи клиническэ ушэтынхэу ашIыгъэхэм ащ ишIуагъэ къызэрыкIорэр, щынэгъончъэу зэрэщытыр къаушыхьатыгъ. КоронавирусымкIэ сымаджэхэм япроцент 70-м зэхэт Iэзэгъоу арахьылIэрэм игъусэу «КОВИД-глобулиныр» ахалъхьагъ ыкIи узыр хьылъэу апэкIэкIыным ищынагъо бэкIэ нахь макIэ хъугъэ. Препаратыр профилактикэм фэIорышIэрэп, Iэзэгъум нахь фэгъэзагъ.

Ростехым игендиректорэу Сергей Чемезовым къызэриIуагъэмкIэ, коронавирусым зэрэпэуцужьыщтхэ амалитIу джы урысые медикхэм яIэ хъугъэ: вакцинэр ыкIи иммуноглобулиныр.