Къэбзэныгъэм фэгъэзагъ
Коммунальнэ пыдзэфэ пытэхэм ядэщын фытегъэпсыхьэгъэ зэхъокIыныгъэр гъэцэкIагъэ зэрэхъурэм АР-м и Парламент изэхэсыгъоу джырэблагъэ щыIагъэм щытегущыIагъэх.
Шъугу къэдгъэкIыжьын, ООО-у «ЭкоЦентр» зыфиIорэр ары пыдзэфэ пытэхэм ядэщын фэгъэзэгъэ шъолъыр операторэу Адыгеим щылажьэрэр. 2019-рэ илъэсым ищылэ мазэ и 1-м ащ IофшIэныр ригъэжьагъ.
Республикэм исым ипроцент 90,4-мэ хэкIэу къырахырэр Iуищынэу шъолъыр операторым зэзэгъыныгъэ дашIыгъ. Адыгеим исыр, статистикэм къызэригъэлъагъорэмкIэ, нэбгырэ 463167-рэ мэхъу. Адыгеим Iоф щызышIэрэ юридическэ лицэхэм ыкIи предпринимательхэм япроцент 69,9-р ары хэкIым идэщынкIэ фэIо-фашIэхэр фэгъэцэкIэгъэнхэм фэгъэхьыгъэ зэзэгъыныгъэм кIэтхагъэр.
ООО-у «ЭкоЦентр» зыфиIорэм и Адыгэ шъолъыр къутамэ ипащэу Алыбэрд Налбый Парламентым идепутатхэм яупчIэхэм джэуапхэр къаритыжьызэ, контейнерхэр зытет площадкэхэм ыкIи ахэм къапэIулъ чIыпIэхэм ягъэкъэбзэн ГъэIорышIэкIо компаниехэмрэ чIыпIэ зыгъэIорышIэжьын органхэмрэ зэрэфэгъэзагъэхэр къыIуагъ.
Хэта зыгъэкъэбзэн фаер?
Парламентым идепутатхэм ямызакъоу, хэкIэу къырахырэр зыдагъэтIылъыщт площадкэхэм ягъэкъэбзэн зипшъэрылъым республикэм исхэри бэрэ къыкIэупчIэх. Ахэм язытет ары нахьыбэрэмкIэ шъолъыр операторым пыдзэфэ пытэхэм яIущынкIэ ипшъэрылъхэр зэригъэцакIэхэрэм уасэ зэрэфашIырэр.
ХэкIыр зэратэкъорэ контейнерхэр зыдэщыт чIыпIэр къэшIыхьэгъэн ыкIи пыдзафэхэр Iузыщыщт транспортыр екIолIэшъунэу щытын фае. Мы площадкэм ыкIи ащ къыпэIулъ чIыпIэхэм ягъэкъэбзэн фэтэрыбэу зэхэт унэхэм я ГъэIорышIэкIо организациехэр е чIыпIэ зыгъэIорышIэжьын органхэр лъыплъэнхэ фае. Пыдзэфэ пытэхэр Iузыщыщт автомашинэр къэкIоным ыпэкIэ ахэр зэкIэ ГъэIорышIэкIо организацием ипхъэнкIакIохэм агъэкъэбзэныр япшъэрылъхэм ащыщ.
Шъолъыр операторым хэкIыр зэрылъ контейнерхэр къызэблихъунхэр е къыунэкIынхэр ары иIофшIэныр.
— Унэхэм хэкIэу къарахырэр зэрахьылIэщт чIыпIэхэм ягъэкъэбзэн организацие зэфэшъхьафхэр зэдыдэлажьэх. Лъэшэу тыкъэлъаIо хэкIэу къишъухырэр зэришъутэкъущтым пылъ шэпхъэ тIэкIур жъугъэцэкIэнэу. Контейнерхэм псэолъэшIыным къыпыкIыгъэ е нэмыкI пыдзэфэ инхэр, чъыг къутамэхэр, кондэ иупкIыгъэхэр арышъутакъо хъущтэп. АхэмкIэ шъуушъэрэ бакхэм нэмыкI пыдзафэхэр арыфэжьырэп. КъызкIэнэгъэ пкъыгъохэри бакхэм арышъумыдзэх, — къыIуагъ ООО-у «ЭкоЦентрэм» и Адыгэ шъолъыр къутамэ ипащэу Алыбэрд Налбый.
Къыхэдгъэщымэ тшIоигъу, субсидиеу Адыгеим сомэ миллиони 8-м ехъу къыфэкIощт. АщкIэ хэкIыр зэхэдзыгъэу цIыфхэм къыратэкъун амал щыIэнэу бакхэр джыри къащэфыщтых.
ООО-у «ЭкоЦентр» зыфиIорэм и Адыгэ шъолъыр къутамэ ипресс-къулыкъу