Сэнаущыгъэ зыхэлъ ныбжьыкIэхэр къыхагъэщыгъэх

Адыгэ Республикэм щыпсэурэ ныбжьыкIэхэу, лъэныкъо зэфэшъхьафхэмкIэ сэнаущыгъэ изыхэлъхэр къыхагъэщыгъэх, ахъщэ шIухьаф­тынхэр аратыгъэх.

Республикэ естественнэ-­хьисап еджапIэм кIэлэеджэкIо нэ­бгырипшIымэ ащафэгу­шIуа­гъэх. АР-м гъэсэныгъэмрэ шIэныгъэмрэкIэ иминистрэ игуадзэу Евгений Лебедевым ахэм шIуфэс гущыIэхэмкIэ за­къыфигъэзагъ.

«ШIэныгъэ-техническэ творчествэр ыкIи гъэсэныгъэ-ушэтын IофшIэныр» зыфиIорэ лъэны­къомкIэ Мыекъопэ районымкIэ гъэсэныгъэ гупчэу N 2-м ще­джэрэ Регина Белоус, Мые­къопэ гурыт еджапIэу N 11-м щеджэрэ Максим Богорубовыр, Мыекъуапэ дэт лицееу N 8-м чIэс Андрей Гогуадзе, Красногвардейскэ районым ит гимназиеу N 1-м щеджэрэ Вадим Дюминыр яшIэныгъэхэмкIэ нахь къахэщыгъэх.

ИскусствэхэмкIэ Адыгэ рес­публикэ колледжэу Тхьабысымэ Умарэ ыцIэ зыхьырэм ще­джэрэ Елизавета Призовар «Художественнэ творчествэмкIэ» къыхагъэщыгъ.

Спортым ылъэныкъокIэ Шэу­джэн районым ит гурыт еджапIэу N 4-м щеджэрэ Ордэн Батыр, Тэхъутэмыкъое районымкIэ спорт еджапIэу N 3-м чIэс Нэхэе Рэмэзан, Теуцожь районымкIэ къуаджэу Нэчэрэзые дэт гурыт еджапIэу N 4-м щеджэрэ Хьакъуй Амир, Кощ­хьаблэ дэт спорт еджапIэм кIорэ Умуд Рафаил Эминовыр, Адыгэкъалэ игурыт еджапIэу N 1-м щеджэрэ Ягъумэ Азэмэт агъэшIуагъэх.

РеспубликэмкIэ анахь къа­хэщыгъэ ныбжьыкIэхэм илъэс къэс ахъщэ шIухьафтынхэр аратых. Къэралыгъо программэу «Гъэсэныгъэм ихэхъоныгъ» зыфиIорэм ар къыды­хэлъытагъ. ШIухьафтын къызытефэхэрэр зэнэкъокъу шIыкIэм тетэу къыхахых.

ДЕЛЭКЪО Анет.